शेतकरी उत्पादक कंपन्या स्थापनेबाबत विशेष बैठक

नाशिक : जागतिक द्राक्ष उत्पादनात नाशिकचा मोठा वाटा आहे. जिल्ह्यात सव्वा लाख हेक्टर क्षेत्रावर ५० हजारांहून अधिक शेतकऱ्यांनी द्राक्ष लागवड केली आहे. जिल्ह्यात मोठ्या प्रमाणावर निर्यातक्षम द्राक्ष तयार होतात. याकामी पॅकहाउस, शीतगृहे, वाहतूक,   पॅकिंग साहित्य व रोजगार यामुळे जिल्ह्यात मोठ्या संधी निर्माण झाल्या. त्यात अनेक द्राक्ष उत्पादक व संबंधित घटक समृद्ध झाले आहे. मात्र, सद्यःस्थितीत अनियंत्रित व असंघटित व्यापारामुळे द्राक्ष उत्पादकांचे अर्थकारण विस्कळित झाले आहे. यासाठी सकारात्मक विचार करून पुढील दिशा ठरविण्यासाठी ही बैठक आयोजित करण्यात आली आहे.

भारतीय व आंतरराष्ट्रीय बाजरपेठेत सक्षम द्राक्ष विक्री व्यवस्था उभी करणे, नवीन पेटंट द्राक्ष वाणांच्या संदर्भात शेतकरी उत्पादक कंपन्यांच्या स्थापना या विषयावर चर्चा केली जाणार असून, या विशेष बैठकीचे आयोजन मंगळवारी (ता. १६) दुपारी ३ वाजता द्राक्ष बागायतदार संघ कार्यालय, ओझर मिग येथे करण्यात आले आहे. 

द्राक्ष शेती किफायतशीर होण्यासाठी महाराष्ट्र राज्य द्राक्ष बागायतदार संघ, दाभोळकर प्रयोग परिवार, सह्याद्री शेतकरी उत्पादक कंपनी तसेच विविध शेतकरी गट कार्यरत आहेत. मात्र सर्वांचे एकत्रित संघटन व विक्री व्यवस्था नसल्याने द्राक्षाची मार्केटिंग, विक्री व्यवस्था याकरिता देशांतर्गत व आंतरराष्ट्रीय बाजारपेठेत अनेक समस्यांना तोंड द्यावे लागत आहे. याचा फायदा अनेक व्यापारी व संबंधित घटक घेतात. यामुळे शेतकऱ्याला योग्य मोबदला न मिळता त्याचे नुकसान होते. 

यामुळे आगामी काळात द्राक्षाचे मार्केटिंग, विमा, व्यापार व इतर बाबी तसेच तांत्रिक अडचणींवर मात करणे काळाची गरज असल्याने या बैठकीत याबद्दल चर्चा करून मते विचारात घेतली जाणार आहेत. पुढील काळात सामाईक उद्देशाने शेतकरी उत्पादक कंपन्यांच्या माध्यमातून शेतकरी संस्था स्थापन करणे. या माध्यमातून बाजारपेठेवर नियंत्रण मिळवून उत्पादन खर्चाच्या आधारित दर मिळविण्यासह द्राक्ष निर्यातीसंबंधीचे व्यवहार नोंदणीकृत निर्यातदारामार्फत व्हावेत. तसेच नाशिक जिल्ह्यातील द्राक्षाचा विश्वासार्ह ब्रँड तयार करण्याचा या मागील उद्देश आहे.

काळाची पावले ओळखून द्राक्ष उत्पादक शेतकऱ्यांचे संघटन व द्राक्ष पिकाची मूल्यवर्धित साखळी निर्माण करण्याच्या हेतूने कृती आराखडा तयार करण्यासाठी उत्सुक व उपक्रमशील शेतकऱ्यांनी बैठकीला स्वयंस्फूर्तीने उपस्थित राहण्याचे आवाहन नाशिक जिल्हा कृषी विभाग, महाराष्ट्र राज्य द्राक्ष बागायतदार संघ, नाशिक विभाग यांनी केले आहे.