नाशिक-पुणे रेल्वे कामाला गती द्यावी

नाशिक : रेल्वे मंत्रालय व राज्य सरकारतर्फे मनमाड- इंदूर मार्गाबाबत नुकताच ''एमओयू'' करण्यात आला असून, नाशिक- पुणे हा लोहमार्गही लवकर कार्यान्वित करावा, यासाठी पालकमंत्री गिरीश महाजन यांनी रेल्वेमंत्री पीयूष गोयल व मुख्यमंत्री देवेंद्र फडणवीस यांना पत्र दिले आहे.

नाशिक-पुणे-मुंबई हा खरे तर गोल्डन ट्रँगल असून, पुण्यामध्ये मोठ्या प्रमाणात औद्योगिकीकरण झालेले आहे. या ठिकाणच्या जागांचे भाव प्रचंड असून, जागेची उपलब्धताही फारशी नाही. त्यामुळे पुणे-नाशिकची कनेक्टिव्हिटी चांगली झाल्यास नाशिकच्या विकासाला मोठ्या प्रमाणात संधी उपलब्ध होणार आहेत, असे निवेदनात नमूद करण्यात आले आहे.

रेल्वे मंत्रालयाने २२० किलोमीटर प्रतितास धावण्याच्या क्षमतेचे नवीन कोचेस आणूनही रेल्वे ट्रॅकची क्षमता निम्मीच असल्याने त्या अपेक्षित वेगाने धावू शकत नाहीत. ही बाब नवीन लोहमार्गात दूर होणार असल्याने नव्या तंत्रज्ञानाचा अवलंब केल्यामुळे गाडीचा वेग दुपटीने वाढणार आहे. यासाठी सरकार तब्बल साडेसात हजार कोटी रुपयांची गुंतवणूक करणार आहे.

सध्या नाशिक-पुणे रेल्वे प्रकल्पासाठी प्रकल्प अहवाल अंतिम टप्प्यात आहे. सविस्तर सर्वेक्षण, भूसंपादन, तसेच निविदा कार्यवाही याबाबत कालबद्ध पद्धतीने नियोजन होणे अपेक्षित आहे. हा महत्त्वाकांक्षी प्रकल्प वेळेवर कार्यान्वित होण्यासाठी संबंधितांची आढावा बैठक घेण्यात यावी, अशी मागणीही या पत्राद्वारे महाजन यांनी केली आहे.

उद्योगासाठी पथदर्शी प्रकल्प : नाशिकसाठी महत्त्वपूर्ण अशा इगतपुरी-मनमाड या १२४ किलोमीटरच्या तिसऱ्या रेल्वे लाइनचे कामही प्रस्तावित आहे. इगतपुरी आणि मनमाड यादरम्यानची रेल्वे कनेक्टिव्हिटी मोठ्या प्रमाणात वाढणार आहे. तसेच तिसरा व महत्त्वाचा नाशिकचा मनमाड- इंदूर लोहमार्ग धुळे आणि मालेगाव या शहरांतून जाणार असून, तो नाशिकच्या औद्योगिक विकासासाठी पथदर्शी प्रकल्प ठरणार आहे, असा आशावाद वर्तविण्यात आला आहे.