सार्वजनिक ठिकाणी थुंकल्यास कारवाई; दारू, गुटखा विक्रीवरही बंदी

नवी दिल्ली : कोरोना संसर्गाला रोखण्यासाठी ३ मेपर्यंत लॉकडाउनचा कालावधी वाढवण्यात आला आहे. त्याचबरोबर केंद्रीय गृहमंत्रालयाने आपत्कालिन व्यवस्थापन कायद्यानुसार मार्गदर्शक सूचना जारी केल्या आहेत. यानुसार कारवाईचे स्वरुप आणखी कडक करण्यात आले आहे. सार्वजनिक ठिकाणी मास्क वापरणे बंधनकारक असून थुंकल्यास दंड ठोठावला जाणार आहे. तसेच दारु आणि गुटखा विक्रीवरही बंदी घातली आहे. सार्वजनिक ठिकाणी थुंकणाऱ्या व्यक्तीवर पालिका कायद्यातंर्गत ठिकठिकाणी कारवाई केली जाते. परंतु सध्याची स्थिती पाहता कारवाई आणखी कडक करण्यात आली आहे.  मुंबईत महानगरपालिकेच्या वतीने सार्वजनिक ठिकाणी थुंकणाऱ्या व्यक्तीला एक हजार रुपयाचा दंड ठोठावण्यात येणार असून अशा प्रकारची कारवाई अन्य शहरातही केली जात आहे. यात दिल्लीसह अन्य राज्याचा समावेश आहे. कोरोनाचा संसर्ग वाढल्याने बिहार, झारखंड, तेलंगण, उत्तर प्रदेश, उत्तर प्रदेश, उत्तराखंड, महाराष्ट्र, हरियाना, नागालँड आणि आसाम राज्यात अगोदरपासूनच सार्वजनिक ठिकाणी तंबाखूजन्प पदार्थ सेवनास आणि थुंकण्यास बंदी घालण्यात आली आहे. याशिवाय दारु, गुटखा, तंबाखू विक्री आणि थुंकण्यावर कडक निर्बध घालण्यात आले आहेत.