मराठवाड्यातही कपाशीवर लष्करी अळीचा आढळ

मराठवाड्यातही कपाशीवर लष्करी अळीचा आढळ
मराठवाड्यातही कपाशीवर लष्करी अळीचा आढळ

परभणी : जिल्ह्यात मका पिकापाठोपाठ कपाशीवर काही भागांत अमेरिकन लष्करी अळीचा प्राद्रुर्भाव झाल्याने शेतकऱ्यांची चिंता वाढली आहे. मांडाखळी (ता. परभणी) शिवारात मक्यावरील लष्करी अळीने कपाशीच्या पिकाकडे मोर्चा वळवला आहे. या गावातील बीटी कपाशीच्या पिकामध्ये काही प्रमाणात अमेरिकन बोंड अळी (हेलीकोव्हर्पा आर्मीजेरा)चा प्राद्रुर्भाव झाल्याचे देखील आढळून आल्याचे शेतकऱ्यांनी सांगितले.  यंदाच्या जिल्ह्यात मका पिकाची ८७१ हेक्टरवर पेरणी झाली आहे. कणसे येण्याच्या आधी मका पिकावर अमेरिकन लष्करी अळीचा प्रादुर्भाव झाल्याचे आढळून आला. पावसाच्या खंड काळात लष्करी अळीचा उद्रेक झाला होता. अनेक ठिकाणी ५० ते ७० टक्के पर्यंत प्रादुर्भाव आढळून आला होता. सिंगणापूर (ता. परभणी) येथील शेतकरी एकनाथराव साळवे यांच्या १३ एकरवरील मका पिकांवर सुरवातीच्या काळात ५० टक्केपर्यंत लष्करी अळीचा प्रादुर्भाव आढळून आला होता. रासायनिक कीटकनाशकांची फवारणी केल्यामुळे प्रादुर्भाव २ ते ३ टक्क्यापर्यंत कमी झाला आहे. मांडाखळी (ता. परभणी) येथील महादेव राऊत यांच्या शेतामधील अर्धा एकरवरील मक्याची कणसे लष्करी अळीच्या प्रादुर्भावाने नष्ट झाली आहेत. मका पिकांच्या शेजारील भानुदास राऊत यांच्या बीटी कपाशी पिकावर काही ठिकाणी अमेरिकन लष्करी तसेच अमेरिकन बोंड अळी (हिरवी बोंड अळी) (Helicoverpa Armigera) प्रादुर्भाव झाल्याचे आढळून आले. अमेरिकन बोंड अळी पाते, फुले, बोंडाना डंख मारून नुकसान करत आहे. मांडाखळी शिवारातील अन्य काही शेतकऱ्यांच्या कपाशीवर देखील अमेरिकन बोंड अळी आढळून आली. अर्धा मक्याचे पीक पूर्णपणे उद्‌ध्वस्त झाले आहे. कणसे बाजूला टाकून मक्याचा चारा म्हणून वापर करत आहोत. कपाशीवर देखील ही अळी आढळून आली आहे. प्रादुर्भावचे सर्वेक्षण करून शेतकऱ्यांना उपाययोजना सांगाव्यात.   - महादेव राऊत, शेतकरी,  मांडाखळी

तेरा एकरवर मक्यावर सुरवातीच्या काळात ५० टक्क्यांपर्यंत लष्करी अळीचा प्रादुर्भाव आढळून आला होता. कीटकनाशकांच्या फवारणीनंतर ती नियंत्रणात आली. ६ एकर मक्याचे सायलेज केले. ७ एकरवरील मक्याचे उत्पादन घेत आहे. सद्य:स्थितीत मक्यावर लष्करी अळीचा २ ते ३ टक्के प्रादुर्भाव दिसत आहे. - एकनाथराव साळवे, शेतकरी, सिंगणापूर, जि. परभणी यंदा बीटी कपाशीच्या बियाणामध्ये नॉन बीटी कपाशीच्या बियाणे मिसळून देण्यात आले आहे. त्यामुळे कपाशीमध्ये अमेरिकन बोंड अळीचा प्रादुर्भाव झाल्याचे आढळून येत आहे. ज्वारी, बाजरी तसेच काही ठिकाणी मक्यावरदेखील या अळीचा प्रादुर्भाव झाल्याचे आढळून आहे. मक्यावरील अमेरिकन लष्करी अळी कपाशीची पाने, फुले तसेच बोंडांचे नुकसान करते; परंतु कपाशीवरील लष्करी अळीचे नियंत्रण हिरव्या बोंड अळीप्रमाणे करता येते. - डॅा. बी. व्ही. भेदे, कीटकशास्त्रज्ञ,  वसंतराव नाईक, मराठवाडा कृषी विद्यापीठ परभणी  

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com