लोकसहभागातून उभारले कोविड आयसोलेशन केंद्र

बुलडाणा : कोरोनाच्या वाढत्या प्रादुर्भावामुळे ठिकठिकाणची कोविड आयसोलेशन केंद्र तुडुंब भरले आहेत. गाव-खेड्यांमध्ये कोरोना वेगाने वाढत आहे. अशा परिस्थितीत शासकीय यंत्रणेवर भार कमी करण्याच्या उद्देशाने चिखली तालुक्यातील किन्होळा गावकऱ्यांनी जिल्ह्यातील पहिले कोविड आयसोलेशन केंद्र उभारले आहे. लोकांनी लोकांसाठी लोकसहभागातून सुरू केलेले हे पहिले आयसोलेशन केंद्र असून, जिल्हाधिकारी एस. राममूर्ती यांनी या उपक्रमाचे कौतुक केले आहे. लोकसहभागातून कोविड आयसोलेशन केंद्राचा किन्होळा पॅटर्न संपूर्ण जिल्हाभर राबविणार असल्याचा मनोदय जिल्हाधिकाऱ्यांनी व्यक्त केला आहे.

या केंद्राचे उद्‍घाटन सोमवारी (ता. तीन) ज्येष्ठ आणि प्रतिष्ठित नागरिक प्रभूकाका बाहेकर यांच्या हस्ते झाले. या केंद्राचे मुख्य संकल्पक तथा स्वाभिमानी शेतकरी संघटनेचे नेते रविकांत तुपकर, जिल्हाधिकारी एस. राममूर्ती, जिल्हा पोलिस अधीक्षक अरविंद चावरिया, जिल्हा आरोग्य अधिकारी डॉ. राजेंद्र सांगळे, शासकीय कोविड केंद्राचे प्रभारी डॉ. सचिन वासेकर, चिखली पोलिस स्टेशनचे ठाणेदार गुलाबराव वाघ, सरपंच अर्चना वसंत जाधव आदी मान्यवर उपस्थित होते.

या वेळी जिल्हाधिकारी म्हणाले, ‘‘लोकसहभागातून आयसोलेशन केंद्र उभारण्याच्या उपक्रमाने मी भारावलो. गावकऱ्यांचे कौतुक करावे तेवढे कमीच आहे.’’ चावरिया, डॉ. वासेकर, तुपकर यांनी या वेळी गावकऱ्यांचे कौतुक केले.

या वेळी किन्होळा प्राथमिक आरोग्य केंद्राचे डॉ. अनिल साळोख, डॉ. अनिल पांढरे, डॉ. आकाश सदावर्ते, डॉ. स्वप्नील अनाळकर, डॉ. श्रद्धा पाटील, डॉ. भाग्यश्री खेडेकर, डॉ. दीपाली महाजन, गावच्या उपसरपंच कल्पना राजपूत, पोलिस पाटील नंदकिशोर बाहेकर, राजू बाहेकर, मधुकर बाहेकर, ग्रा. पं. सदस्य शेख आरिफ शेख रज्जाक, ग्रामसेवक रमेश मुंडे, कृषी सहायक विष्णू डुकरे, शेख ताहेर शेखजी, भगवानसिंह राजपूत, दिनकर बाहेकर, बबनराव बाहेकर, अॅड. विश्‍वासराव बाहेकर, शिक्षक यांच्यासह अनेक उपस्थित होते.