सोलापूर : राज्य बॅंक देणार चार कारखान्यांना कर्ज

सोलापूर : केंद्र शासनाने सॉफ्ट लोन घेण्यास साखर कारखान्यांना परवानगी दिली आहे. त्यामुळे राज्य बॅंकेने राज्यातील साखर कारखान्यांना कर्ज देण्याचा निर्णय घेतला आहे. त्यानुसार जिल्ह्यातील चार साखर कारखान्यांना राज्य बॅंकेकडून कर्ज मिळणार आहे. या कर्जातून प्रामुख्याने शेतकऱ्यांच्या एफआरपीच्या रकमा प्राधान्याने अदा केल्या जातील, असेही सूत्रांकडून सांगण्यात आले.  

यंदा साखरेचे उत्पादन मोठ्या प्रमाणावर झाले, पण त्याला उठाव नाही. त्यातच गेल्या वर्षीचीही साखर शिल्लक आहे. साखरेची विक्री होऊ न शकल्याने कारखान्यांना शेतकऱ्यांच्या एफआरपीचे पैसे देणे अडचणीचे झाले आहे. साखर विक्री होत नसल्याने कारखान्यांनी सॉफ्ट लोन घेण्यास परवानगी मागितली होती. केंद्र शासनाने ती परवानगी दिली आहे. त्यानुसार राज्यातील सुमारे ४२ बॅंकांनी राज्य बॅंकेकडे कर्जाची मागणी केली. 

केंद्र सरकारनेही बाजारातील साखरेची परिस्थिती पाहून त्यास मान्यता दिली. या कर्जापैकी एका वर्षाचे व्याज हे केंद्र सरकार भरणार आहे. यामध्ये जिल्ह्यातील चार साखर कारखान्यांचा समावेश आहे. त्यात सहकार महर्षी शंकरराव मोहिते-पाटील साखर कारखान्याला ४१ कोटी ९३  लाख, लोकमंगल शुगर इथेनॉल भंडारकवठेला १६ कोटी ५८ लाख, सहकार शिरोमणी वसंतराव काळे साखर कारखान्याला १३ कोटी ५३ लाख आणि संत दामाजी सहकारी कारखान्याला ११ कोटी ७ लाख रुपये कर्ज मंजूर झाले. पण या पैशातून कारखान्यांनी एफआरपीसाठीची तरतूद अधिक केल्याचे सांगण्यात येते. त्यामुळे काही प्रमाणात का होईना एफआरपीचा प्रश्न सुटण्याची चिन्हे आहेत. या कारखान्यांना आता मेपर्यंत कर्ज उचलण्यास साखर आयुक्तांनी मुदत दिली.