फळे, भाजीपाला पुरवठ्यासाठी राज्यभर नियंत्रण कक्ष

पुणे : कोरोनाच्या पार्श्वभूमीवर ग्राहकांना फळे व भाजीपाला उपलब्ध करण्यासाठी कृषी विभागाची यंत्रणा सज्ज झाली आहे. राज्यातील शेतकरी उत्पादक कंपन्या व शेतकरी गटांकडून फळे आणि भाजीपाल्याचा पुरवठा सुरळीत होण्यासाठी कृषी आयुक्तालयाने प्रत्येक जिल्ह्यात नियंत्रण कक्ष तयार केले आहेत.  कोरोना विषाणू साथीमुळे राज्यभर सुरू असलेल्या संचारबंदीमुळे फळे व भाजीपाला उत्पादक शेतकऱ्यांना विक्रीसाठी अनेक समस्यांना सामोरे जावे लागत आहेत. त्यामुळे कृषी आयुक्त सुहास दिवसे यांनी सर्व जिल्ह्यातील एसएओंना कक्ष उभारण्याच्या सूचना दिल्या. त्यानंतर २४ तासात ३५ नियंत्रण कक्ष उभे राहिले आहेत.  शासनाने फळे व भाजीपाला या जीवनाश्यक वस्तूचा पुरवठा राहण्याकरिता निर्देश दिलेले आहेत. कोरोनाच्या पार्श्वभूमीवर भाजीपाला व फळे पुरविण्याची जबाबदारी कृषी विभागाकडे देण्यात आली आहे. फळे व भाजीपाला उपलब्ध करणाऱ्या शेतकरी संस्था, गट आणि उत्पादक संघटनांसाठी नियंत्रण कक्ष काम करतील. शहरी व निमशहरी भागात फळे व भाजीपाल्याचा पुरवठा सुरळीत होण्यासाठी कक्षाचे अधिकारी काम करणार आहेत.  नियुक्त केलेल्या अधिकाऱ्यांनी कार्यक्षेत्रातील भाजीपाला व फळे उत्पादन करणाऱ्या शेतकरी उत्पादक गट, संघ, कंपन्या यांची माहिती संकलित करावी. तसेच बाजाराची ठिकाणी निश्चित करण्यासाठी महानगरपालिकेच्या अधिकाऱ्यांशी संपर्क साधणे, माल वाहतूक परवान्यासाठी प्रादेशिक परिवहन अधिकारी, प्रांत अधिकारी, तहसीलदार, पोलिस यंत्रणा अधिनस्त उपविभागीय कृषी अधिकारी, तालुका कृषी अधिकारी व कर्मचारी यांच्याशी समन्वय ठेवावा. यासोबत कोणत्याही परिस्थितीत भाजीपाला व फळे यांचा पुरवठा खंडीत होणार नाही, याची दक्षता घेऊन केलेल्या कार्यवाहीचा अहवाल रोजच्या रोज सादर करावा. शेतकरी उत्पादक कंपन्या, संघ, शेतकरी गटाची माहिती संकलित करून जिल्हाधिकाऱ्यांकडे देण्याची जबाबदारी एसएओंकडे देण्यात आली आहे.   राज्यातील सर्वात मोठी बाजार समिती असलेल्या वाशी मार्केटसाठी ९४२११९४२१२ व ९४२२४३०२७८ असे दोन क्रमांक नियंत्रण कक्षाचे आहेत. राज्यातील फळे व भाजीपाला पुरवठयाबाबत कृषी आयुक्तालयातील नियंत्रण कक्षाचा क्रमांक ०२०-२५५१०६८४ असा आहे.  जिल्हानिहाय नियंत्रण कक्षाचे संपर्क क्रमांक