धुळे : कांदा दरप्रश्‍नी शेतकरी संघटनेचे निवेदन

धुळे  ः कांद्याचे दर बऱ्यापैकी वाढल्याने मध्यंतरी शेतकऱ्यांना त्याचा लाभ मिळू लागला होता. नव्या हंगामातही दर स्थिर राहतील, असे वाटत होते. परंतु, केंद्र सरकारने कांद्याची निर्यात व निर्यातमूल्य यासंबंधी शेतकरीविरोधी निर्णय, अटी लागू केल्याने दर पुन्हा खाली आले आहेत. या अटी मागे घेतल्या जात नाहीत तोपर्यंत कांद्याचे लिलाव, खरेदी बंद करावी, अशी मागणी शरद जोशीप्रणीत शेतकरी संघटनेतर्फे साक्री (जि. धुळे) येथील बाजार समितीकडे करण्यात आली आहे.  संघटनेचे उत्तर महाराष्ट्र विभागाचे अध्यक्ष शशिकांत भदाणे यांनी याबाबत निवेदन दिले आहे. त्यात म्हटले आहे, की कांद्याचे दर मागील वर्षात नोव्हेंबरपासून ते यंदाच्या जुलैपर्यंत दबावात होते. जुलैच्या अखेरीस दरात सुधारणा होत गेली. ऑगस्ट, सप्टेंबरमध्ये दर ४००० रुपये प्रतिक्विंटलपर्यंत पोचले.  यामुळे शेतकऱ्यांना मध्यंतरी आलेले नुकसान भरून निघेल व दिवाळीनंतर बाजारात जो कांदा येईल, त्यासही चांगले दर मिळतील, दर स्थिर राहतील, अशी अपेक्षा वाढली. परंतु सरकारने कांद्याचे दर कमी व्हावेत यासाठी निर्यातमूल्य, निर्यातबंदी अशा अटी, नियम लागू केले. यामुळे कांद्याचे दर आठवडाभरात कमी झाले. शेतकऱ्यांचे मोठे नुकसान होत आहे. हे नुकसान भरून निघणार नाही. कारण पुढेही दर वाढतील, अशी स्थिती नाही. सरकारने हा निर्णय लागू करून शेतकऱ्यांचे नुकसान केले आहे. हा निर्णय जोपर्यंत सरकार मागे घेत नाही, निर्यातीला प्रोत्साहन मिळून दर जोपर्यंत सुधारत नाहीत तोपर्यंत साक्री बाजारात कांद्याची खरेदी बंद करावी, कांदा लिलाव बंद करावेत, अशी मागणी भदाणे यांनी केली. निवेदन देताना शांताराम गांगुर्डे, जगन्नाथ राजपूत, पोपट कुवर, दीपक सोनवणे, एन. झेड. देवरे, देवीदास भदाणे आदी उपस्थित होते.