वंचित शेतकऱ्यांसाठी राज्यांनी पुढाकार घ्यावा ः ः तोमर

पुणे : ‘‘आधुनिक तंत्रज्ञानाचा वापर करून देशातील १० कोटी ७५ लाख शेतकऱ्यांच्या खात्यात थेट ‘पीएम-किसान’ योजनेचा निधी जमा करण्यात आला आहे. शासनाची पारदर्शकता व जलद सेवा यातून सिद्ध होते. मात्र अद्यापही या योजनेपासून वंचित असलेल्या शेतकऱ्यांना लाभ देण्यासाठी राज्यांनी पुढाकार घ्यावा,’’ असे आवाहन केंद्रीय कृषिमंत्री नरेंद्रसिंह तोमर यांनी केले.  

पंतप्रधान शेतकरी सन्मान निधी योजनेला दोन वर्षे झाल्याबद्दल उत्कृष्ट कामगिरी करणाऱ्या राज्यांचा गौरव करण्यासाठी दिल्लीत आयोजिलेल्या कार्यक्रमात ते बोलत होते. या वेळी महाराष्ट्राच्या वतीने कृषिमंत्री दादा भुसे, कृषी सचिव एकनाथ डवले, कृषी आयुक्त धीरज कुमार यांनी राज्य पातळीवरील पारितोषिक स्वीकारले.

योजनेतील लाभार्थ्यांची भौतिक तपासणी व तक्रार निवारण अशा दोन्ही मुद्द्यांवर उल्लेखनीय कामगिरी केल्याबद्दल दोन जिल्ह्यांना पारितोषिक देण्यात आले. पुण्याच्या वतीने जिल्हाधिकारी राजेश देशमुख, एसएओ ज्ञानेश्वर बोटे, निवासी उपजिल्हाधिकारी डॉ. जयश्री कटारे यांनी, तर नगरच्या वतीने जिल्हाधिकारी आर. बी. भोसले, एसएओ शिवाजी जगताप, निवासी उपजिल्हाधिकारी संदीप निचिट यांनी पारितोषिक स्वीकारले.

शेतकऱ्यांसोबत चर्चेस तयार ः तोमर पीएम-किसान योजनेच्या पारितोषिक वितरण सोहळ्यानंतर पत्रकारांनी केंद्रीय कृषिमंत्र्यांना आंदोलनबाबत छेडले. ‘‘शेतकऱ्यांच्या मुद्द्यांबाबत केंद्र सरकार संवेदनशील आहे. काही मुद्दे आल्यास शेतकऱ्यांसोबत चर्चा करण्यासाठी सरकार तयार आहे,’’ असे उत्तर नरेंद्रसिंह तोमर यांनी दिले.