दूधप्रश्‍नी आज राज्यभर किसान सभेचे आंदोलन

नगर ः दुधाला दर मिळावा यासाठी गुरुवारी (ता. १७) किसान सभेतर्फे राज्यभर आंदोलन करण्यात येणार आहे. किसान सभेचे पदाधिकारी आपापल्या भागात या आंदोलनात सहभागी होतील. सकाळी दूध संकलन केंद्रावर शेतकरी व आंदोलक सरकाररूपी दगडाला दुग्धाभिषेक घालतील व त्यानंतर तहसील, जिल्हाधिकारी कार्यालयावर जाऊन मागण्याचे निवेदन देतील, अशी आंदोलनाची रूपरेषा ठरली आहे. दूध उत्पादक संघर्ष समितीचे पदाधिकारीही आंदोलनात सहभागी होणार आहेत. 

कोरोनामुळे दुधाला मागणी नसल्याचे सांगून खासगी दूध संघचालकांनी दुधाचे दर कमी केले आहे. त्याचा मोठा आर्थिक फटका दूध उत्पादकांना बसत असताना सरकारने मात्र त्याकडे दुर्लक्ष केल्याने दूध उत्पादक मेटाकुटीला आले आहेत. दूध व्यवसायाची अवस्था गंभीर झाली असताना सरकार दुधाच्या प्रश्‍नाकडे दुर्लक्ष करत असल्याने किसान सभेने गुरुवारी राज्यभर दूध व इतर शेतकरी प्रश्‍नावर आंदोलन पुकारले आहे. 

त्यानुसार किसान सभेचे व दूध उत्पादक शेतकरी संघर्ष समितीचे पदाधिकारी आपापल्या भागात या आंदोलनात सहभागी होतील. सकाळी दूध संकलन केंद्रावर शेतकरी व आंदोलक सरकार रुपी दगडाला दुग्धाभिषेक घालतील व त्यानंतर तहसील, जिल्हाधिकारी कार्यालयावर जाऊन मागण्याचे निवेदन देतील. 

आंदोलनात अजित नवले अकोल्यात, उमेश देशमुख सांगलीत, उदय नारकर कोल्हापुरात, सिद्धपा कलशेट्टी सोलापुरात, दादा रायपुरे बुलडाण्यात, अर्जुन आडे नांदेड, किसन गुजर व सुनील मालुसरे नाशिकमध्ये व इतर पदाधिकारी त्या त्या भागात सहभागी होणार आहेत. सर्व ठिकाणी आंदोलक कोरोनाचे नियम पाळतील, असे सांगण्यात आले.