सातारा जिल्ह्यात ७७३ एकरांवर तुती लागवड

संग्रहित छायाचित्र
संग्रहित छायाचित्र

सातारा  ः जिल्ह्यात रेशीम शेती करण्याकडे शेतकऱ्यांचा कल वाढल्याने दरवर्षी तुतीच्या क्षेत्रात वाढ होत आहे. जिल्ह्यात आजपर्यंत एकूण ७९५ शेतकऱ्यांनी ७७३ एकरांवर तुतीची लागवड केली आहे. जिल्ह्यात सर्वाधिक तुती लागवड सातारा तालुक्यात झाली असल्याची माहिती रेशीम कार्यालयाच्या सूत्रांनी दिली आहे.

शेतीला पूरक उद्योग या दृष्टिकोनातून रेशीम शेती फायदेशीर ठरू लागली आहे. शेतकऱ्यांचा रेशीम शेतीकडे कल वाढावा, यासाठी शासनाने महात्मा गांधी हमी योजनेअंतर्गत रेशीम शेती योजना कार्यान्वित केली होती. या योजनेस शेतकऱ्यांकडून चांगला प्रतिसाद मिळत आहे. सप्टेंबरअखेर सर्व योजनेअंतर्गत जिल्ह्यातील ७९५ शेतकऱ्यांनी ७७३ एकरांवर तुतीची लागवड केली आहे.

कऱ्हाड, सातारा, वाई, खंडाळा, फलटण, कोरेगाव, माण व खटाव या तालुक्‍यांतील शेतकऱ्यांचा यात समावेश आहे. २०१२-१३ मधील दुष्काळामुळे तुतीच्या क्षेत्रात मोठ्या प्रमाणात घट झाली होती. पाण्याअभावी अनेक शेतकऱ्यांना नाईलास्तव तुती काढून टाकावी लागली होती. त्यानंतर झालेल्या जलसंधारणाच्या कामांतून पाण्याची उपलब्धता होऊ लागल्याने वाई येथील रेशीम कार्यालयाने फायदेशीर रेशीम शेतीचा प्रसार आणि प्रचारावर भर दिला. यातून रेशीम शेती करण्याकडे तरुण शेतकऱ्यांचा कल वाढला. कर्नाटकातील रामनगर येथील बाजारपेठेत अपेक्षित दर मिळाल्याने जिल्ह्यातील तुती क्षेत्रात वाढ होत गेली.

माण, खटाव, फलटण, कोरेगाव, खंडाळा या दुष्काळी तालुक्यांसह सातारा व कऱ्हाड तालुक्य़ातील शेतकरी रेशीम शेती करीत आहेत. जिल्हयात सर्वाधिक तुती लागवड सातारा तालुक्यातील १७६ शेतकऱ्यांनी १७५ एकर क्षेत्रावर केली आहे.  

तालुका निहाय तुतीचे लागवड क्षेत्र
तालुका शेतकरी क्षेत्र (एकर)
कऱ्हाड १०३ ९९
सातारा १७६ १७५
वाई ५७ ५४
खंडाळा ३२ ३२
खटाव ५३ ४५
माण १३४ १३१.५०
फलटण ११० १११.५०
कोरेगाव १३० १२५

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com