संग्रहित छायाचित्र
संग्रहित छायाचित्र

पाथर्डी, पारनेरमध्ये सर्वाधिक टॅंकरने पाणीपुरवठा 

नगर : जिल्ह्यात पाणीटंचाईचे गंभीर परिणाम दिसत आहेत. जिल्हाभरात ७२१ टॅंकरने पाणी पुरवठा केला जात असून एकट्या पाथर्डी तालुक्यात तब्बल १४१ टॅंकरने पाणी दिले जात आहे. एप्रिल महिन्यात एवढ्या मोठ्या प्रमाणात टॅंकरने पाणी देण्याची ही पहिलीच वेळ आहे. 

जिल्हाभरात यंदा भूजल पातळी खालावलेली आहे. त्यामुळे यंदाच्या उन्हाळ्यापूर्वीच या दोन्ही तालुक्‍यांत टॅंकरची संख्या शतकापार गेली. सध्या पारनेरमध्ये १२१, तर पाथर्डी तालुक्‍यात १४१ टॅंकरने पाणीपुरवठा सुरू आहे. याशिवाय नगरपंचायतींकडूनही या दोन्ही तालुक्‍यांत २२ टॅंकर सुरू आहेत. या वर्षी पावसाने दगा दिल्यानंतर भूजल पातळी खोल गेली. पारनेर व पाथर्डीखालोखाल कर्जत तालुक्‍यातील ४७ आणि कोपरगाव तालुक्‍यातील ४३ गावांमधील भूजलपातळी ही तीन मीटरपेक्षा खोल गेली. या सर्वांचा परिणाम म्हणजे, या तालुक्‍यांमध्ये फेब्रुवारीमध्येच पिण्याच्या पाण्यासाठी टॅंकर सुरू करावे लागले.

जामखेड, कर्जत, शेवगाव आणि नगर तालुक्‍यांतही टॅंकरचे अर्धशतक झाले आहे. या आठवड्यात जिल्ह्यातील टॅंकरची संख्या ७२१ झाली असून, पुढच्या महिन्यापर्यंत त्यात लक्षणीय वाढ होण्याची शक्‍यता आहे. विशेष म्हणजे, श्रीरामपूर तालुक्‍यात अद्याप एकाही टॅंकरची गरज भासलेली नाही. दुष्काळाची दाहकता दिवसेंदिवस वाढत चालली आहे. कधी नव्हे तो जलस्तर मोठ्या प्रमाणात खोल गेल्याने जिल्ह्यातील ९० टक्के विहिरी व कूपनलिका कोरड्या पडल्या आहेत. अनेक पाणीयोजनाही बंद पडल्या आहेत. प्रशासनाने टॅंकरच्या मागणीसाठी अर्ज करण्याचे आवाहन केल्यानंतर अनेक गावांनी टॅंकरची मागणी केली.

सध्या जिल्ह्यातील १४ तालुक्‍यांतील सुमारे ११ लाख १२ हजार ४९५ लोकांची तहान टॅंकरच्या पाण्यावर भागविली जात आहे. येथील ४७८ गावे आणि दोन हजार ६९३ वाड्या-वस्त्यांवर टॅंकर किंवा बैलगाडीने पाणीपुरवठा सुरू आहे.  

टॅंकरची तालुकानिहाय संख्या : संगमनेर ४८, अकोले तीन, कोपरगाव १०, श्रीरामपूर ०, राहुरी  एक, नेवासे २६, राहाता चार, नगर ५८, पारनेर १२१, पाथर्डी १४२, शेवगाव ५९, कर्जत ९३, जामखेड ५०, श्रीगोंदे ४६. नगरपंचायतींकडून पाणीपुरवठा ः पारनेर १६, जामखेड ३८, पाथर्डी ६.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com