द्राक्ष उत्पादकांची व्यापारी, मजूरांकडून होणारी फसवणूक थांबवा

नाशिक : सुमारे ९५ टक्के द्राक्ष व्यापारी हे परप्रांतीय आहेत. गेल्या काही वर्षांपासून हे व्यापारी शेतकऱ्यांकडून द्राक्ष खरेदी करून इतर राज्यात पाठवतात. परंतु, पैसे न देता पळून जातात. शेतकऱ्याची फसवणूक करतात. ही फसवणूक थांबवा, अशी मागणी नाशिक शेतकरी संघटना व शेतकरी प्रतिनिधींच्या शिष्टमंडळाने नाशिक विभागाचे विशेष पोलीस महानिरीक्षक प्रताप दिघावकर यांच्याकडे केली. 

कर्ज काढून द्राक्ष उत्पादन घेतलेल्या शेतकऱ्यांचे फार मोठे नुकसान होते. बऱ्याच शेतकऱ्यांना मालमत्ता विकावी लागली आहे. व्यापारी जिल्ह्यातून माल विकत घेऊन पैसे न देता फसवणूक करून निघून जातात. त्यांच्यावर शासनाचा कोणत्याही प्रकारचा निर्बंध नसतो. हे सर्व टाळण्यासाठी शासनाकडून पणन महामंडळाकडून उपाययोजना आवश्‍यक आहेत, असे दिघावकर यांनी सांगितले.

शासकीय यंत्रणेकडे या व्यापाऱ्यांची नोंदणी करून शेतमाल खरेदीपूर्वी व्यापाऱ्यांचे आधारकार्ड, पॅनकार्ड, बँकेचे अकाउंट, रेशन कार्ड, असे पुरावे घ्यावे. त्यांच्याकडून योग्य रकमेचे डिपॉझिट व नोंदणी शुल्क घ्यावे. द्राक्ष व इतर फळपिके विकत घेण्याचा परवाना शासनाने द्यावा. त्यामुळे शेतकऱ्यांची फसवणूक टळेल, अशी भूमिका यावेळी मांडण्यात आली.  

द्राक्ष उत्पादक शेतकऱ्यांकडे टोळ्या कामासाठी येतात. टोळ्या हंगाम सुरू होण्याच्या अगोदर शेतकऱ्यांकडून पैशांची उचल घेतात. नंतर कामावर येत नाहीत. अशाही पद्धतीने शेतकऱ्यांची फसवणूक होत आहे. शेतकरी पोलिस ठाण्यात  तक्रार करण्यासाठी गेल्यानंतर अशा टोळ्या प्रमुखांवर फसवणुकीचे गुन्हे दाखल करावे, अशी मागणी करण्यात आली.

यावेळी शेतकरी संघर्ष संघटनेचे अध्यक्ष हंसराज वडघुले, द्राक्ष विज्ञान मंडळाचे अध्यक्ष वसंत ढिकले, उपाध्यक्ष चंद्रकांत बनकर, उत्तर महाराष्ट्र  शेतकरी संघर्ष संघटनेचे प्रमुख नाना बच्छाव, संभाजी ब्रिगेड, मराठा महासंघाचे नितीन रोटे पाटील, मनोज भारती, राहुल बिऱ्हाडे यासह शेतकरी उपस्थित होते.