सटाणा, जि. नाशिक : बागलाण तालुक्यात गेल्या महिनाभरापासून खत विक्रेत्यांकडून युरियासह इतर रासायनिक खतांची कृत्रिम टंचाई निर्माण केली आहे. शेतकऱ्यांना चढ्या दराने आणि अटी शर्ती लावत खतांची विक्री होत आहे. शासनाने तालुक्यातील शेतकऱ्यांना तत्काळ आवश्यक खतांचा पुरवठा करून त्यांची पिळवणूक थांबवावी आणि त्यांना दिलासा द्यावा, अन्यथा तीव्र आंदोलन छेडण्याचा संतप्त इशारा बागलाण तालुका राष्ट्रवादी काँग्रेसने दिला आहे.
तालुक्यात खतांच्या कृत्रिम टंचाईबाबत कृषी विभागाकडून जाणीवपूर्वक दुर्लक्ष होत असल्याने शेतकऱ्यांमध्ये संतापाची भावना आहे. चढ्या दरात किंवा विक्रेता देईल तिच रासायनिक खते शेतकऱ्यांना नाईलाजास्तव खरेदी करावी लागत आहे. शेतकऱ्यांची पिळवणूक करणाऱ्या विक्रेत्यांचा परवाना रद्द करून त्यांच्यावर फौजदारी स्वरूपाचे गुन्हे दाखल करणे गरजेचे आहे. या संदर्भात माजी आमदार संजय चव्हाण, तालुकाध्यक्ष शैलेश सूर्यवंशी यांच्या नेतृत्वाखाली शेतकऱ्यांनी तहसीलदार जितेंद्र इंगळे-पाटील यांची भेट घेऊन मागणीचे निवेदन दिले.
याबाबत तहसीलदार श्री. इंगळे-पाटील यांनी तत्काळ दूरध्वनीवरून तालुका कृषी अधिकारी सुधाकर पाटील यांच्याशी संपर्क साधून कोणत्याही परिस्थितीत खतांचा पुरवठा सुरळीत करावा, अशा सूचना तहसीलदारांनी कृषी अधिकाऱ्यांना केल्या. यावेळी तालुकाध्यक्ष शैलेश सूर्यवंशी, राष्ट्रवादी युवक काँग्रेस बागलाण अध्यक्ष अमोल बच्छाव, जिल्हा उपाध्यक्ष किरण पाटील, धिरज बागूल, अनिल चव्हाण, पप्पू वाघ, पांडुरंग सोनवणे, पंडितराव सोनवणे, रत्नाकर सोनवणे, जिभाऊ सोनवणे आदींसह शेतकरी उपस्थित होते.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.