उजनीच्या पाण्यासाठी बार्शीत किसान सभेचा रास्ता रोको

सोलापूर : उजनीचे पाणी ढाळे पिंपळगाव मध्यम प्रकल्पात सोडावे, यासाठी अखिल भारतीय किसान सभेने तुळजापूर रस्त्यावरील शेलगाव चौकात गुरुवारी (ता. २९) रास्ता-रोको आंदोलन केले. बावी, पिंपळगाव, मळेगाव, महागाव, खांबगाव, साकत, पानगाव, कळंबवाडी, चिखर्डे, तांदूळवाडी परिसरातील शेतकऱ्यांनी त्यात भाग घेतला. 

चार-पाच दिवसांपूर्वीच किसान सभेने याच प्रश्नावर आंदोलन केले होते. त्यानंतरही दखल घेतली गेली नसल्याने आता पुन्हा रास्ता-रोको करण्यात आला. तानाजी ठोंबरे यांच्या नेतृत्वाखाली हे आंदोलन झाले. 

ठोंबरे म्हणाले, ‘‘आमच्या संघटनेने तहसीलदारांना पहिले निवेदन देऊन १५ दिवस झाले. हे दुसरे आंदोलन होत आहे. परंतु, प्रशासन काहीच करत नाही. ९, १० व ११ सप्टेंबर रोजी धरणे व उपोषण करण्यात येईल.’’ 

बार्शी तालुका अध्यक्ष लक्ष्मण घाडगे, उपाध्यक्ष लहू आगलावे यांचे भाषण झाले. आंदोलनात ए. बी. कुलकर्णी, धनाजी पवार, प्रवीण मस्तुद, शौकत शेख उपस्थित होते.