पुणे जिल्ह्यात वादळी पावसाचा दणका सुरूच

पुणे : पुणे जिल्ह्याच्या विविध भागांत आठवडाभरापेक्षा अधिक काळापासून वादळी पावसाचा दणका सुरूच आहे. गुरुवारी (ता. १०) रात्री जिल्ह्यात सर्वदूर हलक्या ते जोरदार पावसाच्या सरी कोसळल्या. 

सतत पडणाऱ्या पावसाने काढणीस आलेल्या खरीप पिके, भाजीपाला, फुलपिकांचे नुकसान आहे. तर बारामती, इंदापूर, दौंड, शिरूरसह कोरडवाहू तालुक्यात रब्बीच्या पेरण्यांना वेग आला आहे. जिल्ह्यातील धरणांच्या क्षेत्रातही पाऊस पडत असल्याने धरणांच्या पाणीसाठ्यात काहीशी वाढ होणार आहे. 

जवळपास आठवडाभरापासून सकाळी कडक ऊन, दुपारी ढगाळ हवामानासह उकाडा आणि रात्री वादळी वारे विजांसह जोरदार सरींचा पाऊस पडत आहे. तुरळक स्वरूपात गाराही पडत आहे. गुरुवारी रात्री उशिरा हवेली, मावळ, खेड, जुन्नर, आंबेगाव, शिरूर, बारामती, दौंड आणि पुरंदर तालुक्यांत जोरदार तर उर्वरित तालुक्यात हलक्या पावसाने हजेरी लावली. 

हवेली तालुक्यातील खेड-शिवापूर परिसराला पावसाने झोडपले. सुमारे दोन तास झालेल्या पावसाने ठिकठिकाणी पाणी साचले. गोगलवाडी, शिंदेवाडी, ससेवाडी, वेळू, श्रीरामनगर, खेड-शिवापूर या गावांना जोरदार पावसाने झोडपून काढले. या पावसाने ओढे नाल्यातून मोठ्या प्रमाणात पाणी वाहत होते. पावसामुळे खरिपाच्या पिकांचे नुकसान झाले असतानाच, परतीचा पाऊस रब्बीच्या पेरण्यांसाठी लाभदायक ठरणार आहे. 

बारामती, इंदापूर, शिरूर, दौंड तालुक्‍यात चांगला पाऊस झाल्याने रब्बी हंगामाच्या पेरण्यांना सुरवात झाल्याने या भागातील शेतकरी कामात व्यस्त आहेत. ज्वारी, बाजरी, मका इत्यादींच्या पेरण्या सुरू झाल्या असून, लवकरच हरभरा, गव्हाच्या पेरण्यांना वेग येणार आहे.