शिवना, जि. औरंगाबाद : शिवना (ता. सिल्लोड)सह परिसरात येथे मंगळवारी (ता. १७ ) मध्यरात्री व बुधवारी (ता. १८) पहाटे वादळी पाऊस झाला. त्यात शेकडो हेक्टर क्षेत्रावरील गहू, मका व हरभरा आदी पिके भुईसपाट झाली.
आमसरी, वाघेरा, नाटवी, वडाळी, टाका, मादनी, खुपटा, जळकीबाजार आदी गावांसह उत्तरेकडील डोंगरपट्टयाच्या टापूत शेतकऱ्यांचे मोठे नुकसान झाले. येथे (गट क्रमांक ४०३) मधे विजय काळे, श्यामराव काटे आदी शेतकऱ्यांची पिके जमीनदोस्त झाली. रब्बी पिकाचा हातातोंडाशी आलेला घास निसर्गाने हिरावून घेतल्याने शेतकऱ्यांवर आसमानी संकट कोसळले.
गत पावसाळ्यात झालेल्या अतिवृष्टीमुळे जमिनीतील पाणीपातळी वाढली आहे. विहिरी व प्रकल्प तुडुंब भरले. नदी,नाले ओसंडून वाहिल्याने मुबलक पाणीसाठा उपलब्ध झाला. त्यामुळे रब्बीत शेतकऱ्यांनी हजारो हेक्टर क्षेत्रावर गहू, हरभरा, मका या पिकांसह भाजीपाल्याची लागवड केली. खरिपाची तूट रब्बीत भरून निघेल, या आशेवर शेतकऱ्यांनी ही पिके जगविली.
नुकसान भरपाईची मागणी
दरम्यान, मंगळवारी मध्यरात्री व बुधवारी पहाटेच्या अवकाळी पावसाने शेतकऱ्यांच्या आशेवर पाणी फिरवले. प्रशासनाने नुकसानीचे तातडीने पंचनामे करून शेतकऱ्यांना नुकसानभरपाई द्यावी, अशी मागणी होत आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.