वादळी वाऱ्याने भोपळा, कारल्याचे मांडव जमीनदोस्त

नाशिक : जिल्ह्यात पावसाने समाधानकारक हजेरी लावल्याने शेतकऱ्यांना दिलासा मिळाला आहे. मात्र, गुरुवारी (ता. ११) नाशिक तालुक्याच्या पश्चिम भागात वादळी वाऱ्यासह झालेल्या पावसामुळे भाजीपाल्याचे नुकसान झाले आहे. पावसाचा सर्वाधिक भोपळा, कारले या फटका फळभाज्यांना फटका बसला आहे. 

तालुक्याच्या पश्चिम भागात गंगापूर धरणाच्या बॅक वॉटर परिसरात गणेशगाव, पिंपळगाव गरुडेश्वर या गावांमध्ये अनेक शेतकऱ्यांनी एप्रिल- मे महिन्यात भोपळा, कारले पिकांची लागवड केली आहे. सद्यःस्थितीत अनेक शेतकऱ्यांचा शेतीमाल काढणीला सुरवातही झाली. नाशिक, कल्याण व मुंबई बाजारांत व्यापाऱ्यांकडून सध्या चांगली मागणी आहे. त्यामुळे शेतकऱ्यांना समाधानकारक दोन पैसे मिळायला सुरवात झाली. मात्र, पावसासोबत झालेल्या वादळामध्ये अनेक शेतकऱ्यांचे भोपळा व कारल्याचे मांडव जमीनदोस्त झाले. त्यामुळे मोठा फटका शेतकऱ्यांना बसला आहे. त्यामुळे या हंगामात केलेले भाजीपाल्याचे नियोजन व शेतकऱ्यांचे आर्थिक नियोजन कोलमडणार आहे. केलेला हा खर्च वाया जाणार आहे.

भांडवल, पाणी व वीजपुरवठा यांची अडचण असताना भोपळ्याची लागवड केली. यंदा शेतीमालाला चांगला भाव मिळाला नाही. त्यात पदरमोड करून अर्धा भोपळ्याची लागवड केली. मुंबईच्या व्यापाऱ्यांची मागणी असल्याने दोन पैसे व्हायला सुरवात झाली होती. मात्र, सगळे कष्ट आता मातीमोल झाले. शासनाने पंचनामे करून मदत घ्यावी.  - झावरू बाळा कापसे, शेतकरी, गणेशगाव, ता. जि. नाशिक