सातारा जिल्ह्यात स्ट्रॅाबेरी लागवडपूर्व कामे वेगात सुरू

सातारा  ः राज्यभरात गोडव्यासाठी प्रसिद्ध असलेल्या महाबळेश्र्वर तालुक्यातील स्ट्रॅाबेरीच्या लागवडपूर्व कामांना गती आली आहे. पावसाने उघडीप दिल्याने जमिनीची मशागत करणे, मल्चिंग, बेड सोडणे आदी कामांमध्ये शेतकरी सध्या व्यस्त असल्याचे चित्र महाबळेश्र्वर तालुक्यात दिसत आहे.

महाबळेश्र्वर तालुक्यात मागील तीन महिन्यांत जास्त प्रमाणात पाऊस झाल्याने पिके कुजून नुकसान झाले आहे. यामुळे येथील शेतकऱ्यांसह लोकप्रतिनिधींनी ओला दुष्काळ जाहीर करण्याची मागणी केली होती. तालुक्यातील प्रमुख पीक असलेल्या स्ट्रॅाबेरी लागवड काळात निसर्गाकडून साथ मिळत आहे.

मागील तीन ते चार दिवसांपासून पावसाने पूर्णपणे विश्रांती घेतली असल्याने लागवडपूर्व कामांना चांगले वातावरण निर्माण झाले आहे. सध्या जमीन मशागतीच्या कामांना वेग आला आहे. यामध्ये नांगरट, बेड सोडणे, मल्चिंग यासह रोपे ट्रेमध्ये तयार करून ठेवण्यात आली आहेत, तसेच पाण्यासाठी ठिबक सिंचन संच बसविण्याचे कामे सुरू आहेत. एकूणच तालुक्यातील शेतकरी स्ट्रॅाबेरी पिकाच्या कामात व्यस्त झाले असल्याचे चित्र पाहावयास मिळत आहे.

रोपेनिर्मितीसाठी महाबळेश्र्वर तालुक्यात सुमारे १२ लाख मातृरोपे आली होते. यापासून सहा कोटींवर रोपे तयार झाल्याचा अंदाज आहे. या रोपांतून एकट्या महाबळेश्र्वर तालुक्यात अडीच हजार एकरांवर स्ट्रॅाबेरी लागवड होईल, असे शेतकरी सांगत आहेत. पुढील आठवड्यापासून स्ट्रॅाबेरी लागवडीस गती येईल. खरिपातील भात, बटाटा, नाचणी आदी पिकांचे अतिपावसाने शेतकऱ्यांचे मोठ्या प्रमाणात नुकसान झाल्याने आता सर्व भिस्त स्ट्रॅाबेरी पिकावर आहे. महाबळेश्र्वरबरोबरच जावळी, वाई, खटाव, सातारा या तालुक्यांतही स्ट्रॅाबेरी लागवड होत असते. येथेही मशागतीची कामे सुरू झाली आहेत.