पावसामुळे स्ट्रॉबेरीचा हंगाम लांबणीवर

पुणे : मॉन्सूनचा लांबलेला मुक्काम आणि मॉन्सूनोत्तर पावसामुळे पुणे जिल्ह्यातील स्ट्रॉबेरीच्या लागवडी लांबणीवर पडल्याने हंगाम किमान दोन महिने लांबणार आहे. केलेल्या लागवडीचे पावसामुळे नुकसान झाल्याने काही शेतकऱ्यांना दुबार लागवड करावी लागली आहे. यामुळे डिसेंबरमध्ये नाताळसाठी विशेष मागणी असलेल्या स्ट्रॉबेरीची आवक कमी आणि दर वाढण्याची शक्यता देखील शेतकरी आणि व्यापाऱ्यांनी व्यक्त केली आहे. 

पुणे बाजार समितीमध्ये साधारण दिवाळी दरम्यान स्ट्रॉबेरीची आवक सुरू होते. मात्र यंदा दिवाळी संपून महिना झाली तरी जिल्ह्यातील आवक सुरु झालेली नाही. पुणे जिल्ह्यात भोर, वेल्हा, जुन्नर, आंबेगाव, बारामती आणि सासवड परिसरात स्ट्रॉबेरीची लागवड होते. साधारण गणेशोत्सवादरम्यान ही लागवड होते. मात्र यंदा गणेशोत्सवा दरम्यान झालेल्या पावसामुळे केलेल्या लागवडी वाया गेल्या.

काही शेतकऱ्यांनी पावसाच्या भितीने लागवडी लांबवल्या. त्यामुळे आता १५ दिवसांपासून लागवडी सुरू झाल्या असून, याचे उत्पादन डिसेंबरअखेर तुरळक प्रमाणात सुरू होईल, अशी माहिती स्ट्रॉबेरीचे प्रमुख अडतदार युवराज काची यांनी दिली.  सध्या केवळ महाबळेश्‍वर परिसरातून ५०० किलो आवक सुरू असून, हिच आवक गतवर्षी सुमारे २ टनांपर्यंत होती. गेल्या वर्षी प्रतिकिलोला १०० ते १५० रुपये असणारा दर सध्या १५० ते ३०० रुपये आहे. नाताळमध्ये विशेष मागणीमुळे आवक कमी झाल्यास दर ४०० रुपयांपर्यंत वाढण्याची शक्यता असल्याचे काची म्हणाले.