सातारा जिल्ह्यात महायुतीची ताकद वाढली

सातारा ः जिल्ह्यात लोकसभा मतदारसंघाची जागा राष्ट्रवादी काँग्रेसने जिकंली असली तरी, महायुतीचे चार उमदेवार विजयी झाले असल्याने महायुतीची ताकद वाढली आहे. काँग्रेस आघाडीकडून पृथ्वीराज चव्हाण, बाळासाहेब पाटील, मकरंद पाटील, दीपक चव्हाण तर महायुतीकडून शिवेंद्रसिंहराजे भोसले, शंभूराज देसाई, जयकुमार गोरे, महेश शिंदे हे निवडून आले आहे. जिल्ह्यात सर्वाधिक बाळासाहेब पाटील यांना ४९ हजारांचे मताधिक्य मिळवले आहे. 

शिवेंद्रराजेची चौथ्यांदा बाजी  जावळी विधानसभा मतदारसंघात भाजपचे शिवेंद्रसिंहराजे भोसले आणि राष्ट्रवादीचे दीपक पवार यांच्यात झालेल्या समोरासमोरच्या लढतीत शिवेंद्रसिंहराजेंनी चौथ्यांदा तब्बल ४२ हजार ४२४ मतांनी विजय मिळविला. सातारा मतदारसंघ यापूर्वीही भोसले घराण्याकडे होता. शिवेंद्रसिंहराजे यांना एक लाख १८ हजार पाच मिळाली. तर दीपक पवार यांनी ७४ हजार ५८१ मते मिळाली आहेत. 

पृथ्वीराज चव्हाणांची गड राखला  कऱ्हाड दक्षिण विधानसभा मतदारसंघात माजी मुख्यमंत्री आमदार पृथ्वीराज चव्हाण यांनी नऊ हजार १३० मताधिक्‍याने दुसऱ्यांदा विजयश्री खेचून आणली. श्री. चव्हाण यांना ९२ हजार २९६ मते मिळाली. त्यांचे प्रतिस्पर्धी भाजपचे अतुल भोसले यांना ८३ हजार १६६, तर बंडखोरी करून अपक्ष म्हणून रिंगणात उतरलेल्या ॲड. उदयसिंह पाटील-उंडाळकर यांना २९ हजार ४०१ मते मिळाली. अखेर पृथ्वीराज चव्हाणांनी नऊ हजार १३० मताधिक्यांनी विजय मिळवत गड राखला. 

बाळासाहेब पाटील यांना मताधिक्य  कऱ्हाड उत्तर विधानसभेचे पाचव्यांदा प्रतिनिधित्व करणाऱ्या राष्ट्रवादी काँग्रेसचे उमेदवार आमदार बाळासाहेब पाटील यांनी विक्रमी ४९ हजारांचे मताधिक्‍य घेत कऱ्हाड उत्तर राष्ट्रवादीचा बालेकिल्ला असल्याचे सिद्ध केले. मतमोजणीअखेर ४९ हजार २१५ इतके मताधिक्य मिळाले. मतमोजणीत आमदार पाटील यांना एक लाख ५०९, मनोज घोरपडे यांना ५१ हजार २९४, तर धैर्यशील कदम यांना ३९ हजार ७९१ मते मिळाली. 

मकरंद पाटील यांची विजयाची हॅटट्रिक  वाई विधानसभा मतदारसंघातील भोसले व पाटील घराण्यांच्या पारंपरिक लढतीत राष्ट्रवादीचे विद्यमान आमदार मकरंद पाटील यांनी भाजपचे उमेदवार माजी आमदार मदन भोसले यांच्यावर ४३ हजार ६४७ मात करून विजयाची हॅटट्रिक केली. त्यांना एक लाख ३० हजार ४८६, तर त्यांचे प्रतिस्पर्धी  भाजपचे उमेदवार मदन भोसले यांना ८६ हजार ८३९ मते मिळाली. सर्व फेरीत मकरंद पाटील यांनी आघाडी घेतली. मकरंद पाटील यांना एक लाख ३० हजार ४८६ तर मदन भोसले यांना ८६ हजार ८३९ मते मिळाली. 

पाटणमध्ये शंभू ‘राज'  पाटण विधानसभा मतदारसंघात राष्ट्रवादी पक्षाचे उमेदवार सत्यजितसिंह पाटणकर यांना सलग दुसऱ्या वेळी पराभवाचा धक्का देत विद्यमान आमदार शंभूराज देसाई यांनी १४ हजार २२६ चे मताधिक्‍य घेऊन पाटणला पुन्हा शंभू‘राज’च सिद्ध केले. आमदार देसाई यांना एक लाख पाच हजार ९६५ तर सत्यजितसिंह पाटणकर यांना ९१ हजार ७३९ मते मिळाली.  

माणमध्ये पुन्हा जयकुमार गोरे  माण मतदारसंघात मतमोजणीच्या शेवटच्या फेरीपर्यंत उत्कंठावर्धक ठरलेल्या लढतीत आमदार जयकुमार गोरे यांनी ३०४३ मतांनी बाजी मारत एकवटलेल्या विरोधकांना अस्मान दाखवले. माजी सनदी अधिकारी प्रभाकर देशमुख यांचे प्रयत्न अपुरे पडले. तर शेखर गोरेंना शिवधनुष्य पेललेच नाही. तिसऱ्यांदा हॅटट्रिक साधण्याची किमयाही गोरेंनी केली. गोरेंनी ३०४३ मतांनी बाजी मारली. जयकुमार गोरे यांना ९१ हजार ४६९, प्रभाकर देशमुख यांना ८८ हजार ४२६ तर शेखर गोरे यांना ३७ हजार ५३९ मते मिळाली.

दीपक चव्हाण यांची विजयी हॅटट्रिक  फलटण विधानसभा मतदारसंघात राष्ट्रवादी कॉंग्रेसचे उमेदवार आमदार दीपक चव्हाण यांचा विजय झाला. चव्हाण यांनी त्यांचे निकटचे प्रतिस्पर्धी, महायुतीचे उमेदवार दिगंबर आगवणे यांचा ३० हजार ९८१ एवढ्या मताधिक्‍याने पराभव केला. या विजयाने फलटण विधानसभा मतदारसंघावर विधान परिषदेचे सभापती रामराजे नाईक निंबाळकर यांचेच प्रभुत्व असल्याचे पुन्हा एकदा सिद्ध झाले. दीपक चव्हाण यांना एक लाख १७ हजार ६१७ तर दिगंबर आगवणे यांना ८६ हजार ६३६ मते मिळाली.