जीवनावश्यक वस्तूंची साठेबाजी विरोधात धडक मोहीम

नाशिक : जीवनावश्यक वस्तूंची विक्री करतांना मालाची साठेबाजी करणाऱ्या, कृत्रीम भाववाढ करू पाहणाऱ्या व्यापारी व दुकानदारांच्या विरोधात पुरवठा विभागामार्फत स्टिंग ऑपरेश करण्यासाठी जिल्ह्यात पथके नेमण्यात आलेली आहेत, या पथकांनी शनिवारी (ता. २८) ३७ दुकानांवर धाडी घालत २ दुकाने सील करण्यात आल्याची माहिती जिल्हाधिकारी सूरज मांढरे यांनी दिली.

जिल्हा पुरवठा अधिकारी अरविंद नरसीकर यांच्या नियोजनाखाली राबवलेल्या स्टींग ऑपरेशनच्या धडक मोहिमेत धान्य वितरण अधिकारी यांनी १०, तहसीलदार नाशिक यांनी ७, तहसीलदार दिंडोरी यांनी १० व तहसीलदार सुरगाणा यांनी ५ अशा एकूण ३२ किराणा दुकानदार , होलसेल व रिटेल दुकानदार यांची तपासणी या पथकांमार्फत करण्यात आली. त्यात नाशिक येथील सुभाष नगरातील होलाराम ॲण्ड सन्स , नाशिकरोड व कालीका मंदिर येथील स्वस्त धान्य दुकान क्र. १२४ यांची दुकाने तपासणी पथकामार्फत सील करण्यात आलेली आहेत. 

जिल्ह्यातील संचारबदीच्या स्थितीचा गैरफायदा घेऊन जीवनावश्यक वस्तूंची साठेबाजी व कृत्रीम भाववाढ करणाऱ्या किराणा दुकानदार, होलसेल व रिटेल दुकानदार यांच्या विरुद्ध कठोर कारवाई पुरवठा विभागामार्फत करण्यात येत आहे. 

जादा किमतीने विक्री केल्यास कारवाई जिल्ह्यात जीवनावश्यक वस्तूंचा पुरेसा साठा आहे. तसेच कोणत्याही किराणा दुकानदार, होलसेल व रिटेल दुकानदार यांनी साठेबाजी किंवा जादा किमतीस वस्तुची विक्री करू नये, तसे केल्यास त्यांच्याविरुद्ध कठोर कारवाई केली जाईल, याची नोंद घ्यावी, असेही जिल्हाधिकारी मांढरे यांनी कळविले आहे.