डाळिंब बागा वाचविण्यासाठी धडपड

आटपाडी, जि. सांगली :  यंदा तालुक्यात रिमझिम आणि मॉन्सूनोत्तर पावसाच्या तडाख्यात डाळिंबाचे नुकसान झाले. उरल्यासुरल्या डाळिंब बागा वाचवण्यासाठी शेतकऱ्यांची मोठी धडपड सुरूच आहे. ज्या बागा वाचल्या, त्या सुरक्षित ठेवण्यासाठी शेतकऱ्यांनी डाळिंबाच्या बागावर कागद आणि कापडाचे आच्छादन केले आहे. त्यामुळे डाळिंबाचा दर्जा चांगला राहण्यास मदत होणार आहे. 

आटपाडी तालुक्यात बहुतांश शेतकरी मृग हंगामात जून आणि जुलै महिन्यात डाळिंबाचा हंगाम धरतात. यावर्षी जुलै महिन्यापासून पावसाची रिपरिप सुरू झाली. त्यावेळी ऊन पडले नसल्यामुळे बागांना अपेक्षित कळी निघाली नाही. त्यात अवकाळी पाऊस सुरू झाला. बागांत पाणी साचून राहिले. शेताला पाझर लागले. त्यामुळे डाळिंब बागांचे मोठे नुकसान झाले. बागा पूर्ण वाया गेल्या आहेत. काही शेतकऱ्यांनी बागा सोडून दिल्या आहेत. पाणी निचरा होणाऱ्या बागांत कुठेतरी थोडे डाळिंब आले आहेत. त्याच्यावरही तेलकट रोगाने हल्ला चढवला आहे. 

मोठ्या प्रमाणावर पाऊस झाल्यामुळे सकाळी मोठ्या प्रमाणावर धुके पडत आहेत. त्यामुळे फळावर ऊन चट्टा पडू लागला आहे. बुरशीजन्य रोग आणि इतरही डाग पडू लागले आहेत. ही फळे बाजारपेठेत खरेदी केली जात नाहीत. त्यामुळे शेतकऱ्यांची उरलीसुरली डाळिंबे वाचविण्यासाठी धडपड सुरू आहे.

बागा तणानी भरल्या आहेत. ऊन चटटा आणि बुरशीजन्य रोगापासून वाचवण्यासाठी बनवलेल्या कागदी कपड्याने बागा झाकण्याचे काम वेगात सुरू आहे. तसेच भांगलणीचीही कामे गतीने सुरू आहेत.