राज्यात वादळी पावसाची शक्यता

पुणे : पूर्वमोसमी पावसाला पोषक हवामान होत असल्याने राज्यात शनिवारपासून (ता. २) काही ठिकाणी वादळी पावसाची शक्यता आहे. कोकणात रविवारपासून (ता. ३) कोकणात, तर मंगळवारपासून (ता. ५) मध्य महाराष्ट्र, मराठवाड्यात पाऊस वाढण्याची शक्यता आहे. मंगळवारी कोकण, मध्य महाराष्ट्र, मराठवाड्यात विजा, मेघगर्जनेसह पाऊस पडण्याचा इशारा हवामान विभागाने दिला आहे. शुक्रवारी (ता.१) दुपारनंतर पुण्यात विजा, मेघगर्जनेसह पावसाने हजेरी लावली.  मॉन्सूनने कर्नाटकपर्यंत धडक दिली असून, राज्यात ६ ते ८ जूनपर्यंत मॉन्सून येण्याची अंदाज आहे. शुक्रवारी (ता. १) दक्षिण कोकण, गोवा आणि परिसरावर समुद्रसपाटीपासून ९०० मीटर उंचीवर चक्राकार वारे वाहत होते. अरबी समुद्रावरून होत असलेल्या बाष्पाच्या पुरवठ्यामुळे राज्यात पूर्वमोसमी पावसाला पोषक स्थिती निर्माण होत आहे. सकाळपासून वाढलेल्या उकाड्यानंतर दुपारी ढग दाटून येत असून, तुरळक ठिकाणी पाऊसही पडत आहे. गुरुवारी (ता. ३१) सांगली, नगर, परभणी, अकोला, नागपूर, वाशीम जिल्ह्यात जोरदार वाऱ्यांसह वादळी पाऊस पडला. राज्याच्या तापमानातही चढ-उतार होत असून, शुक्रवारी विदर्भातील उष्णतेची लाट निवळली होती. वर्धा येथे राज्यातील उच्चांकी ४४.५ अंश सेल्सिअस तापमानाची नोंद झाली. राज्याच्या उर्वरित भागात तापमानात घट झाल्याचे दिसून आले. मध्य महाराष्ट्रात तापमानाचा पारा ३० ते ४३ अंश, कोकणात ३३ ते ३६ अंश, मराठवाड्यात ४० ते ४३ अंश तर विदर्भात ४१ ते ४५ अंशांच्या दरम्यान आहे.   शक्रवारी (ता. १) सकाळी साडेआठ वाजेपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३८.८, नगर ४३.१, जळगाव ४२.६, कोल्हापूर ३५.५, महाबळेश्वर ३०.६, मालेगाव ४२.०, नाशिक ३८.५, सांगली ३७.०, सातारा ३७.६, सोलापूर ४०.०, मुंबई ३५.०, अलिबाग ३६.२, रत्नागिरी ३३.७, डहाणू ३६.१, आैरंगाबाद ४०.०, परभणी ४३.४, नांदेड ४२.५, अकोला ४३.८, अमरावती ४३.०, बुलडाणा ४१.०, चंद्रपूर ४२.३, गोंदिया ४३.२, नागपूर ४३.०, वर्धा ४४.५, यवतमाळ ४३.०.