धामणटेक येथे ‘पीएमआरडीए’च्या विकास आराखड्यास तीव्र विरोध

राजगुरूनगर, जि. पुणे : पुणे महानगर प्रादेशिक विकास प्राधिकरणाने (पीएमआरडीए) प्रस्तावित केलेल्या विकास आराखड्यास एसईझेड परिसरातील गावांनी तीव्र विरोध केला आहे. त्या विरोधात शेतकऱ्यांनी तीव्र निदर्शने केली आहेत.

एसईझेड परिसरातील रेटवडी, गोसासी, निमगाव, दावडी, कनेरसर, पूर, वरुडे, गाडकवाडी, वाफगाव या गावांतील सरपंच, ग्रामपंचायत सदस्य व नागरिक, शेतकऱ्यांनी तीव्र विरोध करून, धामणटेक येथे विजयसिंह शिंदे पाटील यांच्या नेतृत्वाखाली आंदोलन केले. एसईझेड परिसरातील गावांमध्ये औद्योगिकरणामुळे नागरीकरण वाढत आहे. म्हणून भविष्याच्या दृष्टीने या भागात रहिवासी व व्यावसायिक झोन होणे आवश्यक असताना, पीएमआरडीएने फक्त ग्रीन, ग्रीन-१ व ग्रीन-२, असे झोन टाकले आहेत.

या निर्णयामुळे स्थानिकांना भविष्यात उद्योग व्यवसाय करण्यास अडचण निर्माण होणार आहे. म्हणून लोकांचा आराखड्यास विरोध आहे. एसईझेड परिसरातील गावांचे झोन बदलण्यात यावेत आणि टाकलेली चुकीची आरक्षणे बदलण्यात यावीत, अशी मागणी लोकांनी केली.

प्रास्ताविक मारुती गोरडे यांनी केले. विजयसिंह शिंदे पाटील यांनी आंदोलनाची भूमिका मांडली. या वेळी गोसासीचे सरपंच संतोष गोरडे, कनेरसरच्या सरपंच सुनीता केदारी, दावडीचे सरपंच संभाजी घारे, निमगावचे उपसरपंच संतोष शिंदे, पूरचे माजी सरपंच संदीप गावडे, वरुड्याचे उपसरपंच अण्णा चौधरी, गाडकवाडीचे सरपंच वैभव गावडे, वाफगावचे सरपंच उमेश रामाणे, उपसरपंच नंदकुमार सुर्वे, बी. टी. शिंदे, बबनराव शिंदे, दिलीप माशेरे आदींनी या वेळी विचार मांडले.