शालेय विद्यार्थ्यांनी घरीच पिकविला भाजीपाला 

पुणे : झील शैक्षणिक संस्थेच्या ज्ञानगंगा इंग्लिश मीडियम स्कूल व सिल्वर क्रेस्ट स्कूलमधील विद्यार्थी घरच्या घरीच भाजीपाला पिकवत आहेत. जवळपास तिनशेहून अधिक विद्यार्थी हा अगळावेगळा उपक्रमात सहभागी असून, त्यांना घराच्या बाल्कनीतील कुंड्यांमध्ये मिरची, वांगी, टोमॅटो या भाज्यांची लागवड केली आहे. टाळेबंदीच्या काळात शहरातील विद्यार्थ्यांनी स्वत: पिकविलेली भाजी खाण्याची मजा चाखली आहे.  ज्ञानगंगा इंग्लिश मीडियम स्कूल व सिल्वर क्रेस्ट स्कूलचे इयत्ता सहावीतील विद्यार्थ्यांनी २६ फेब्रुवारी २०२० रोजी बारामती येथे एक दिवसीय शेतीविषयक अभ्यासक्रम केला. सहावीच्या अभ्यासक्रमातील विज्ञान व पर्यावरणविषक गोष्टींचा समावेश करुन ‘गो गेट एक्स’ ने हा कोर्स तयार केला आहे. विद्यार्थ्यांनी कृषी क्षेत्रातील प्रात्यक्षिके अनुभवली व शेतात कामही केले. यातून त्यांना माती, पाणी, पाऊस, फळ भाज्यांचे प्रकार, हवामान इत्यादी प्रकार शिकायला व अनुभवायला मिळाले.  या एक दिवसीय कोर्सनंतर विद्यार्थ्यांना काही फळ भाज्यांची रोपं व सोबत देण्यात आले होते. कोर्सचा भाग म्हणून दिलेल्या रोपांचे काळजी घेऊन घरातील बाल्कनीत कुंडीमध्ये ही रोपं वाढवायची होती. गेल्या महिनाभरातील टाळेबंदीच्या काळात विद्यार्थ्यंनी त्या रोपांची वाढ तर केलीच आणि आता त्याला फळ भाज्या आल्या व त्याची भाजी बनवून जेवणात आस्वादही घेत आहेत. ‘भविष्यातील पिढीला शेतीचे महत्व पटले पाहिजे व शेतकऱ्यांचा आदर या पिढीने पुढे केला पाहिजे या हेतूने आम्ही हा एक दिवसीय कोर्स तयार केल्याचेच गो गेट एक्सचे संस्थापक स्वप्नील रांजणे यांनी सांगितले.