परभणी : ‘‘विद्यार्थ्‍यांची सांस्‍कृतिक, भाषिक व सामाजिक पार्श्‍वभूमी वेगळी आहे. यामुळे महाविद्यालयीन जीवनात वैविध्यपूर्ण सांस्‍कृतिक, बौ‍द्धिक विचारांची देवाणघेवाण होऊन विद्यार्थ्‍यांचे व्‍यक्तिमत्त्व प्रगल्‍भ होईल,’’ असे प्रतिपादन कुलगुरू डॉ. अशोक ढवण यांनी केले.
वसंतराव नाईक मराठवाडा कृषी विद्यापीठांतर्गत विविध महाविद्यालयांत २०१९-२० मध्‍ये भारतीय कृषी संशोधन परिषदेद्वारे अभ्‍यासक्रमात प्रवेश घेतलेल्‍या विद्यार्थ्‍यांचा स्‍वागत समारंभ झाला. ११ राज्‍यातील १५० पेक्षा जास्‍त विद्यार्थ्यांनी विद्यापीठाच्‍या विविध महाविद्यालयांतील पदवी, पदव्‍युत्तर व आचार्य पदवी अभ्‍यासक्रमात प्रवेश घेतला आहे. परभणी कृषी महाविद्यालयाचे प्राचार्य डॉ. धर्मराज गोखले, अन्नतंत्रज्ञान महाविद्यालयाचे प्राचार्य डॉ. अरविंद सावते, लातूर कृषी महाविद्यालयाचे प्राचार्य डॉ. बाबासाहेब ठोंबरे, सहयोगी अधिष्‍ठाता (निम्‍नस्‍तर शिक्षण) डॉ. डी. एन. धुतराज, सामाजिक विज्ञान महाविद्यालयाचे प्राचार्या डॉ. जयश्री झेंड, डॉ. हेमंत देशपांडे आदी उपस्थित होते.
डॉ. ढवण म्‍हणाले, ‘‘पालकांच्‍या आपल्‍या मुलांकडून अनेक अपेक्षा असतात. शिक्षणासाठी गाव सोडणे त्रासदायक असते. महाविद्यालयीन जीवनात विद्यार्थ्यांनी आपल्‍या आई-वडिलांच्‍या संस्‍कारांची सातत्याने जाण ठेवावी. यापूर्वीही विद्यापीठातून विविध राज्‍यांतील अनेक विद्यार्थ्यांनी पदवी प्राप्‍त करून चांगले यश संपादन केले आहे. विद्यार्थ्‍यांना शिकवताना प्राध्‍यापकांनाही स्‍वत:च्‍या अध्‍यापनात सुधार करण्‍याची संधी आहे.’’
डॉ. रणजित चव्‍हाण यांनी सूत्रसंचालन केले. डॉ. प्रल्‍हाद जायभाये यांनी आभार मानले. देशातील ११ राज्‍यांतील १७३ विद्यार्थ्यांनी भारतीय कृषी संशोधन परिषदेच्या माध्‍यमातून प्रवेश घेतला. यात राजस्‍थान, पश्चिम बंगाल, उत्‍तर प्रदेश, बिहार, तेलंगण, आंध्र प्रदेश, केरळ, पंजाब, ओडिशा, मध्‍य प्रदेश, मनिपूर आदी राज्‍यांतील विद्यार्थ्‍यांचा समावेश आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.