पारनेर : कांदा उत्पादक शेतकऱ्यांना सात कोटी दहा लाखांचे अनुदान

नगर ः पारनेर कृषी उत्पन्न बाजार समितीमध्ये १६ डिसेंबर २०१८ ते २८ फेब्रुवारी २०१९ या कालावधीत कांदा विक्री केलेल्या शेतकऱ्यांना ७ कोटी १० लाख ५६ हजार ३७० रुपये कांदा अनुदान मिळाले आहे. हे अनुदान शेतकऱ्यांच्या बँक खात्यावर वर्ग झाल्याची माहिती सभापती प्रशांत गायकवाड यांनी दिली.

कांद्याला मिळणारा दर कमी असल्याने नुकसान झाल्यामुळे कांद्याला अनुदान देण्याच्या सतत होत असलेल्या मागणीचा विचार करून शासनाने प्रथम १ नोव्हेंबर ते १५ डिसेंबर २०१८ या कालावधीसाठी दोन रुपये प्रति किलो दराने कांदा अनुदान जाहीर केले होते. त्याचे २५५२ शेतकऱ्यांना १ कोटी ७२ लाख ९५ हजार २६८ रुपये अनुदान मंजूर होऊन ते शेतकऱ्यांच्या खात्यावर वर्ग करण्यात आले होते. त्यानंतरही कांदा दरात वाढ न झाल्यामुळे शासनाने ३१ डिसेंबर २०१८ पर्यंत नंतर पुन्हा २८ फेब्रुवारी २०१९ पर्यंत कांदा विक्री केलेल्या शेतकऱ्यांना कांदा अनुदान देण्याचे जाहीर केले होते. 

कांदा अनुदान जाहीर केलेल्या मुदतीचे प्रस्ताव १५ एप्रिल २०१९ पर्यंत स्वीकारण्यास मुदत दिली होती. त्यानंतर २० आॅगस्टच्या सभेत वरील सर्व प्रस्तावांना मान्यता दिलेली असून कृषी उत्पन्न बाजार समिती पारनेरमध्ये कांदा विक्री केलेल्या ८०३६ शेतकऱ्यांना ७ कोटी १० लाख ५६ हजार ३७० रुपये कांदा अनुदान शेतकऱ्यांच्या बँक खात्यावर वर्ग करण्यात आलेले आहे. कृषी उत्पन्न बाजार समितीमध्ये सन २००० पासून कांदा खरेदी विक्रीचे व्यवहार सुरू करण्यात आले आहेत. 

बाजार समितीत पारनेर तालुक्यासह श्रीगोंदा, दौंड, नगर, संगमनेर, जुन्नर, शिरूर, खेड तालुक्यातील शेतकरी शेतमाल विक्रीसाठी बाजार समितीमध्ये घेऊन येत आहेत, असे माजी सभापती काशिनाथ दाते, अरुण ठाणगे, अशोक कटारिया, गंगाराम बेलकर, युवराज पाटील, अण्णासाहेब बढे, शिवाजीराव बेलकर, खंडु भाईक, सावकार बुचुडे, संगीता कावरे, राहुल जाधव, विजय पवार, राजश्री शिंदे, हर्षल भंडारी, वसंत चेडे, संभाजी आमले या संचालक मंडळाने केले आहे.