कोल्हापुरातील साखर कारखानदार आज मुख्यमंत्र्यांना भेटणार

कोल्हापूर  ः एफआरपीचा तिढा सुटण्याची शक्‍यता नसल्याने जिल्ह्यातील साखर कारखानदार आज (मंगळवारी) मुख्यमंत्री देवेंद्र फडणवीस यांना भेटणार आहेत. यानंतर गुरुवारी (ता.१०) पालकमंत्री चंद्रकांत पाटील यांच्या पुढाकाराने याबाबत पुन्हा बैठक होईल. रविवारी (ता.६) कारखानदारांची येथील एका खासगी हॉटेलमध्ये बैठक झाली. यामध्ये एफआरपीची रक्कम किती प्रमाणात जमा करायची, याबाबत याही बैठकीत एकमत होऊ शकले नाही. परिणामी मुख्यमंत्र्यांकडे दाद मागण्याचा निर्णय घेण्यात आला.  साखरेचा प्रतिक्विंटल किमान विक्रीदर २९०० वरून ३४०० रुपये करावा, एफआरपीची रक्कम दोन टप्प्यांत देण्यास परवानगी द्यावी किंवा एकरकमी एफआरपी देण्यासाठी शासनाने अनुदान द्यावे, अशा मागण्या कारखानदार मुख्यमंत्र्यांकडे करणार आहेत.  साखरेचा उठाव केला जात नाही. प्रतिक्विंटल साखरेच्या दरात घट होत आहे. शासन साखरेचा किमान विक्री दर वाढवत नाही. त्यामुळे साखर उद्योग अडचणीत आला आहे. सध्या एकरकमी एफआरपी देणे कठीण होऊन बसले आहे. मात्र, सरकार आणि स्वाभिमानी शेतकरी संघटना एकरकमी एफआरपी द्यावी, या भूमिकेवर ठाम असल्यामुळे साखर कारखानदारांमध्ये अस्वस्थता आहे. शेतकऱ्यांना ही रक्कम मिळत नसल्याने त्यांना त्यांचा पुढील व्यवहार करता येत नाही.  मुख्यमंत्री देवेंद्र फडणवीस यांनी साखरेचा किमान विक्री दर वाढवण्याची ग्वाही दिली होती; मात्र अद्याप कार्यवाही झालेली नाही. त्यामुळे साखर कारखाने अडचणीत येत आहेत. शासनाला अनुदान देण्यास जमत नसेल, तर एकरकमी एफआरपी देण्यासाठी अनुदान द्यावे, अशीही मागणी केली जाणार आहे. या वेळी माजी मंत्री प्रकाश आवाडे, आमदार हसन मुश्रीफ, आमदार चंद्रदीप नरके, राजेंद्र पाटील-यड्रावकर आदी उपस्थित होते.  

संघटना आंदोलनावर ठाम  दरम्यान, शेतकरी संघटनांनी एकरकमी एफआरपीबाबत आग्रही भूमिका कायम ठेवली आहे. जर कोणत्या कारखान्याने तुकड्यामध्ये एफआरपीची रक्कम जमा केली, तर त्या कारखान्याचे गाळप बंद करू, असा इशारा स्वाभिमानी शेतकरी संघटनेने दिल्याने हा तिढा आणखी गंभीर होत असल्याचे चित्र सध्य ऊस पट्ट्यात आहे.