ऊसबिल देयके आठ ते दहा दिवसांत देणार

औरंगाबाद : येत्या आठ ते दहा दिवसांत एफआरपीप्रमाणे बिले अदा करण्याचे लेखी आश्वासन दिल्याने शेतकरी संघर्ष समितीने प्रादेशिक साखर सहसंचालक कार्यालयासमोर बुधवारी (ता. ८) सुरू केलेले धरणे आंदोलन अखेर त्याच दिवशी रात्री उशिरा मागे घेतले.

एफआरपीप्रमाणे कारखान्यांना घातलेल्या उसाची देयके अदा करण्याच्या मागणीसाठी प्रादेशिक साखर सहसंचालक कार्यालयासमोर बीड जिल्ह्यातील माजलगाव व वडवणी तालुक्‍यातील शेतकऱ्यांसमवेत शेतकरी संघर्ष समितीच्या माध्यमातून बुधवारी (ता. ८) धरणे आंदोलन सुरू करण्यात आले होते. यासंदर्भात गंगाभिषण थावरे यांनी ३० जुलैला प्रादेशिक साखर सहसंचालक कार्यालयाला निवेदन दिले होते.

निवेदनाची दखल न घेण्यात आल्याने शेकडो शेतकऱ्यांनी बुधवारी प्रादेशिक साखर सहसंचालक कार्यालयावर धडक देत धरणे आंदोलन सुरू केले. एफआरपीप्रमाणे उसाचे बिल देण्यात यावे, लोकनेते सुंदरराव सोळंके सहकारी कारखान्याने; तसेच छत्रपती सहकारी साखर कारखान्याने गतवर्षीचे उसाचे प्रतिटन ६०० रुपये शेतकऱ्यांना द्यावेत, या वर्षी आंदोलकांना लेखी दिल्याप्रमाणे छत्रपती कारखान्याने प्रतिटन १०० रुपये, माजलगाव कारखान्याने प्रतिटन २०० रुपये; तर जयमहेश कारखान्याने प्रतिटन २५० रुपये द्यावेत आदी मागण्या धरणे देणाऱ्या शेतकऱ्यांनी केल्या होत्या.

बुधवारी रात्री साधारणत: अकरा वाजेपर्यंत मागण्यांवर खलबते सुरू होते. या वेळी चर्चेदरम्यान प्रादेशिक साखर सहसंचालक कार्यालयाला ४४० देयके थकीत शेतकऱ्यांच्या नावाची यादी दिली आली.