ऊस लागवड क्षेत्र वाढणार

चालू वर्षी चांगल्या झालेल्या पावसाचा परिणाम ऊस लागवड क्षेत्राच्या वाढीवर झाला आहे. अनेक ठिकाणी शेतकऱ्यांनी मोठ्या प्रमाणात लागवडी केल्या आहेत.
Sugarcane cultivation area will increase
Sugarcane cultivation area will increase

पुणे  : चालू वर्षी चांगल्या झालेल्या पावसाचा परिणाम ऊस लागवड क्षेत्राच्या वाढीवर झाला आहे. अनेक ठिकाणी शेतकऱ्यांनी मोठ्या प्रमाणात लागवडी केल्या आहेत. पुणे विभागात आडसाली, पूर्वहंगामी, सुरू आणि खोडवा उसाचे सरासरी ३ लाख ७० हजार ७८१ हेक्टर क्षेत्र आहे. त्यापैकी १३ जानेवारी अखेरपर्यंत १ लाख ८६ हजार ५४० हेक्टरवर लागवडी झाल्या आहेत. येत्या काळात शेतकऱ्यांनी खोडवा उसाचे क्षेत्र राखल्यास उसाच्या क्षेत्रात आणखी वाढ होणार असल्याचे चित्र आहे.  

चालू वर्षी लवकर दाखल झालेल्या पावसामुळे पुणे विभागातील मुळा, भंडारदरा, कुकडी, उजनी, जायकवाडी, खडकवासला, पानशेत यासह अनेक धरणांत पाण्याची बऱ्यापैकी उपलब्धता आहे. मात्र इतर पिकांच्या तुलनेत ऊस पीक हे शाश्‍वत उत्पन्न म्हणून शेतकरी ऊस पिकांकडे पाहतात. त्यामुळे बहुतांशी शेतकरी दर वर्षी आडसाली उसाच्या लागवडी करतात. यंदा ऑगस्ट, सप्टेंबरमध्ये झालेल्या जोरदार पावसामुळे अनेक शेतकऱ्यांनी उसाच्या लागवडीवर भर दिला आहे. परिणामी, ऊस लागवडीच्या क्षेत्रात मोठ्या प्रमाणात वाढ झाल्याचे चित्र आहे. त्यामुळे पुढील वर्षीच्या गळीत हंगामात मोठ्या प्रमाणात ऊस उपलब्ध होण्याचा अंदाज वर्तविण्यात येण्यात येत आहे.

दर वर्षी शेतकरी आडसाली, पूर्वहंगामी, सुरू अशा तीन हंगामांत उसाच्या लागवडी करतात. जून ते जुलै महिन्यांत आडसाली उसाच्या, तर ऑगस्ट ते सप्टेंबरमध्ये पूर्वहंगामी व ऑक्टोबरनंतर सुरू उसाच्या शेतकरी प्रामुख्याने लागवडी करतात. आडसाली उसाच्या लागवड केल्यानंतर साधारणपणे पंधरा ते सतरा महिन्यांनी, तर पूर्वहंगामी १२ ते १४, पूर्वहंगामी १० ते १२ महिन्यांनी ऊस साखर कारखान्यास तोडणीस देतात. विभागात आडसाली उसाच्या ७४ हजार २३३ हेक्टर, पूर्वहंगामी ३९ हजार २५२ हेक्टर, सुरू १२ हजार ८०१ हेक्टर आणि खोडवा उसाच्या ६० हजार २५४ हेक्टरवर लागवड झाली आहे.

विभागातील नगर जिल्ह्यात शेवगाव, राहुरी, श्रीगोंदा, कर्जत, नेवासा, कोपरगाव या तालुक्यांत मोठ्या प्रमाणात लागवडी झाल्या आहेत. पुणे जिल्ह्यातील दौड, हवेली, शिरूर, बारामती, इंदापूर, जुन्नर, आंबेगाव, पुरंदर या तालुक्यांतही लागवडी झाल्या आहेत. मुळशी, मावळ, वेल्हे, खेड ही तालुके उसाच्या लागवडीपासून दूर आहेत. सोलापूर जिल्ह्यातील माळशिरस, पंढरपूर, करमाळा, माढा, मोहोळ, दक्षिण सोलापूर, मंगळवेढा, अक्कलकोट या तालुक्यांत उसाच्या लागवडी झाल्या आहेत.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com