उसाच्या तोडणीला कोल्हापुरात सुरुवात

कोल्हापूर: जिल्ह्यातील साखर कारखान्यांचा गळीत हंगाम हळूहळू सुरू झाला आहे. शेतकरी संघटनांचा अडथळा दूर झाल्या नंतर यंदा कारखान्यांनी ठरवलेल्या वेळेत हंगाम सुरू होत आहे. गेल्या काही दिवसांपासून पावसाने पूर्णपणे विश्रांती घेतली. त्यामुळे सध्या ऊसतोडणीसाठी अनुकूल वातावरण तयार झाले आहे. 

दसऱ्यानंतर राज्याच्या विविध भागांतून ऊसतोडणी मजूर कारखाना परिसरात दाखल झाले. हंगाम वेळेवर सुरू होण्याची खात्री पटताच विविध कारखान्यातील शेती विभागाचा नियोजनात व्यस्त झाले आहेत. शेतकरी संघटनांची भूमिका जाणून घेण्यासाठी अनेक मजूर आपापल्या गावी थांबले होते, पण हंगाम सुरू होण्याची खात्री पटताच हे मजूर आता कारखान्याकडे येण्यास सुरवात झाली आहे.

काही कारखान्यांनी पुरात पूर्णपणे बुडालेला ऊस पहिल्यांदा देण्याचे नियोजन केले आहे. यानुसार नोंदी असलेल्या उसाची तोड करण्याबाबतचे नियोजन प्रत्येक कारखान्यांमध्ये सुरू आहे. गावाच्या ऊस तोडणी क्षेत्रानुसार संबंधित गावाकडे ऊस तोडणी कामगार रवाना होत आहेत.

कर्नाटकातील कारखान्यांनी यापूर्वीच ऊस तोडणी सुरू केली. त्यामुळे आता राज्यातील कारखान्यांनाही तातडीने ऊस तोडणी सुरू करून हंगाम वेळेत सुरु करावा लागणार आहे. गेल्या महिन्याभरात राज्यात सर्वत्र पाऊस पडला असला तरी जिल्ह्यात मात्र अपवाद वगळता कुठेच पावसाच्या फारशा सरी झाल्या नाहीत. यामुळे सध्या तरी ऊस तोडणीसाठी चांगला वापसा आल्याचे साखर कारखाना सूत्रांनी सांगितले. 

काही कारखान्यांचे व्यवस्थापन सध्या परवाने व तांत्रिक बाबी पूर्ण करण्यात गुंतले आहे. या बाबी पूर्ण झाल्यास तातडीने ऊस तोडणी सुरू करण्याचे आमचे नियोजन असल्याचे कारखाना प्रतिनिधींनी सांगितले.