तिसगाव उपबाजारात चाऱ्यासाठी उसाला प्रतिटन १५०० रुपये भाव

तिसगाव, जि. नगर  : पाथर्डी तालुक्‍यात चाऱ्याची टंचाई निर्माण झालेली आहे. तसेच, पाण्याचा प्रश्‍न गंभीर झाल्यामुळे उसाची आता चाऱ्यासाठी विक्री होऊ लागली आहे. बीड जिल्ह्यातून तिसगाव उपबाजारात ऊस विक्रीस आणला जात आहे.उसाला प्रतिटन १५०० रुपये भाव मिळत आहे.

नगर जिल्ह्यात यंदा पुरेसा पाऊस नाही. त्यामुळे या वर्षी विहिरींनी ऑक्‍टोबरमध्येच तळ गाठला आहे. परिणामी, उसासाठी पाण्याचा प्रश्न निर्माण झाला आहे. त्यातच पाऊस नसलेल्या भागात ऊस जगवण्याचा प्रयत्न सुरू असताना हुमणीचा उसावर प्रादुर्भाव झाला आहे. साखर कारखाने सुरू होण्यास अवधी असल्याने पाण्याअभावी ऊस जळून जाण्यापेक्षा शेतकरी चाऱ्यासाठी त्याची विक्री करीत आहेत. तिसगाव परिसराबरोबरच मराठवाड्यात अशीच परिस्थिती असल्याने बीड जिल्ह्यातील शिरूर, गेवराई, बीड तालुका या भागांतून चाऱ्यासाठी ऊस तिसगावच्या उपबाजारात विक्रीस येत आहे.

‘‘पाऊस चांगला नसल्याने भूजल पातळी खालावलेली आहे. उसाला पाणी देता येत नसल्यामुळे ऊस विक्रीस आणला आहे,’’ असे वंजारवाडी (जि. बीड) येथील ऊस उत्पादक सूरज कुटे यांनी सांगितले.  ‘पाऊस नसल्याने ऊसउत्पादक शेतकरी अडचणीत आले असून, शासनाने अनुदानाच्या स्वरूपात आर्थिक मदत द्यावी, अशी मागणी तीसगाव येथील युवक कार्यकर्ते भाऊसाहेब लवांडे यांनी केली आहे.