सुजय विखे भाजपमध्ये आले.. १० मिनिटांत उमेदवारीही मिळाली !

मुंबई : सुजय विखे हे भाजपचे नगरमधून उमेदवार असतील असे सूतोवाच मुख्यमंत्री देवेंद्र फडणवीस यांनी येथे केले. सुजय विखेंना घरात बंड करावा लागला याचा विचार व्हायला हवा, काही दिवसांनी घरच्यांनाही सुजय यांचा निर्णय योग्य वाटेल, असे मुख्यमंत्री देवेंद्र फडणवीस यांनी सुजय विखेंच्या भाजपप्रवेशानंतर म्हटले आहे.

यावेळी मुख्यमंत्री देवेंद्र फडणवीस आणि प्रदेशाध्यक्ष रावसाहेब दानवे, चंद्रकांत पाटील, गिरीष महाजन, राम शिंदे आणि नगर जिल्ह्यातील भाजपचे आजी-माजी आमदार उपस्थित होते.  

मुख्यमंत्री देवेंद्र फडणवीस यांच्या उपस्थित आज (ता. १२) सुजय विखे पाटील यांनी भाजपमध्ये प्रवेश केला. काँग्रेसचे विरोधीपक्षनेते राधाकृष्ण विखे पाटील यांचे सुपुत्र सुजय विखे पाटील यांच्या प्रवेशाच्या चर्चा गाजत होत्या परंतु त्यांनी आज अधिकृत भाजप प्रवेश केला. यावेळी बोलताना फडणवीस म्हणाले की, यावेळी भाजपप्रणित युतीच्या केंद्रात २०१४ पेक्षा जास्त जागा येतील, महाराष्ट्रात ४८ पैकी ४५ जागा येतील असेही त्यांनी सांगितले.

त्याचबरोबर नगरच्या जागेसाठी सुजय विखे पाटील यांचं नाव भाजपच्या संसदीय मंडळाकडे पाठवणार असल्याचेही त्यांनी यावेळी सांगितले. आम्ही पक्षाकडे सुजय विखेंचं नाव पाठवू, ते त्याला होकार देतील, नगरमधील जागा रेकॉर्ड मताने येईल. डॉ. सुजय विखेंनी कोणतीही अट घातली नाही, सुजय यांच्या रुपाने महाराष्ट्राला चांगलं नेतृत्त्व मिळू शकतं असेही फडणवीस यावेळी म्हणाले. त्याचबरोबर, भाजपच्या सर्व आमदारांशी चर्चा करुन सुजय विखेंना भाजपमध्ये प्रवेश दिला असल्याचे स्पष्टीकरणही  मुख्यमंत्री फडणवीस यांनी यावेळी दिले.

माझ्या संकटाच्या काळात मला आधार आणि आशीर्वाद मुख्यमंत्री देवेंद्र फडणवीस यांनी दिले. त्यामुळे मी मुख्यमंत्री फडणवीस आणि सर्व आमदारांचे आभार मानतो. हा माझा व्यक्तिगत निर्णय असून मी हा निर्णय माझ्या वडिलांच्या इच्छेविरुद्ध घेतला आहे. माझ्या आई वडिलांची या निर्णयाबाबत किती सहमती आहे हे मला माहित नाही. नगर जिल्ह्यात आमदारांच्या मदतीने भाजपच्या वाढीसाठी अहोरात्र प्रयत्न करेन नगरच्या लोकसभेच्या दोन्ही जागा युतीकडे राहतील असा विश्‍वास मी देतो. 

आपल्या भाषणात ते म्हणाले, पंतप्रधान नरेंद्र मोदी यांनी देशाच्या सुरक्षिततेसाठी अनेक प्रभावी निर्णय घेतले आहेत. नरेंद्र मोदी यांचे नेतृत्व हेच खरे नेतृत्व आहे. त्यांच्या मार्गदर्शनाखाली भविष्यातील वाटचालीसाठी भाजप हाच योग्य पक्ष आहे असे माझे आणि माझ्या युवक सहकाऱ्यांचे मत झाले आहे, त्यातूनच आम्ही भाजपप्रवेशाचा निर्णय घेतला. अतिशय सन्मानपूर्वक आणि मुलगा म्हणून मला नेत्यांनी मला पक्षात जागा दिली आहे. आमदार कर्डिले यांचे मला पाच वर्षापासून आशीर्वाद आहेत. अन्य आमदारांनाही विनंती आहे की मी मागे जे बोललो असेन ते विसरून आपला मुलगा मानून कुटुंबात सहभागी करून घ्यावे. 

यावेळी आमदार स्नेहलता कोल्हे, आमदार शिवाजी कर्डिले, मंत्री राम शिंदे, आमदार मोनिकाताई राजळे, मुरकुटे, बबनराव पाचपुते आणि नगर जिल्ह्यातील अनेक नेते उपस्थित होते.