पुणे विभागात उन्हाळी पिकांची २८ टक्के क्षेत्रावर पेरणी

पुणे  ः पुणे विभागातील अनेक भागांत पाणीटंचाईची तीव्रता वाढली आहे. त्याची झळ उन्हाळी हंगामातील पिकांना बसू लागली आहे. उन्हाळी हंगामातील पिकांचे सरासरी पेरणी क्षेत्र २३ हजार ३०० हेक्टर असून, त्यापैकी सहा हजार ५०१ हेक्टर म्हणजेच २८ टक्के क्षेत्रावर पेरण्या झाल्या आहेत. यात प्रामुख्याने उन्हाळी बाजरी, मका, भुईमूग या पिकांच्या समावेश असल्याचे कृषी विभागाच्या सूत्रांनी सांगितले. 

यंदा कमी झालेल्या पावसाचा फटका रब्बी हंगातील पिकांना बसला आहे. त्यातच नोव्हेंबर-डिसेंबरपासून पाणीटंचाई भेडसावू लागली आहे. कमी पावसामुळे भूजलपातळीत चांगलीच घट झाली आहे. विहिरी कोरड्या पडल्या आहेत. त्यामुळे अनेक ठिकाणी टँकरने पाणीपुरवठा सुरू आहे. कमी पावसाचा फटका उन्हाळी पेरण्यांना बसू लागला आहे. पाण्याची सुविधा असलेल्या भागात शेतकऱ्यांनी काही प्रमाणात पेरण्या केल्या आहेत. विभागात उन्हाळी मक्याची १९५१, बाजरीची २५४९, उन्हाळी मुगाची १७, भुईमुगाची १९८४ हेक्टरवर पेरणी झाली आहे.  

विभागात गेल्या काही वर्षांपासून उन्हाळ्यात चाराटंचाईचा मोठा प्रश्न उद्भवत आहे. त्यामुळे शेतकरी मोठ्या प्रमाणात चारापिकांच्या पेरणीकडे वळू लागले आहेत. त्यामुळे उन्हाळी पिकांच्या क्षेत्रात घट होत आहे. विभागातील नगर जिल्ह्यामध्ये उन्हाळी हंगामातील उन्हाळी मका व भुईमूग पिकांच्या अल्प पेरण्या झाल्या असून, पिके वाढीच्या अवस्थेत आहे. जिल्ह्यातील श्रींगोंदा, संगमनेर या तालुक्यांत पेरणी झालेली आहे. 

पुणे जिल्ह्यामध्ये  उन्हाळी बाजरी व भुईमूग पिकाच्या थोड्याफार प्रमाणात पेरण्या झाल्या आहेत. बाजरी, भुईमूग पिके वाढीच्या अवस्थेत आहेत. जिल्ह्यात हवेली, भोर, जुन्नर, खेड, आंबेगाव, शिरूर, बारामती, इंदापूर, दौंड या तालुक्यांत पेरणी झाली आहे. सोलापूरमध्ये उन्हाळी मका व भुईमूग पिके वाढीच्या अवस्थेत आहे. जिल्ह्यात उत्तर सोलापूर, दक्षिण सोलापूर, बार्शी, पंढरपूर, माळशिरस तालुक्यात काही प्रमाणात पेरण्या झाल्या आहेत.