टाटा ट्रस्टकडून विदर्भात हॅन्ड सॅनिटायझरचा पुरवठा 

अमरावती ः कोरोना या विषाणूचा संसर्ग रोखण्याच्या मोहिमेत सामाजिक जाणिवेतून योगदान देत टाटा ट्रस्टकडून विदर्भातील काही जिल्ह्यांमध्ये हॅन्ड सॅनिटायजरचे वितरण करण्यात आले. जिल्हा प्रशासनाला याचा पुरवठा निशुल्क करण्यात आला. 

टाटा ट्रस्टकडून गेल्या अनेक वर्षांपासून विदर्भातील आत्महत्याग्रस्त जिल्ह्यांमध्ये कृषी विकासाला पूरक उपक्रमांवर काम होत आहे. या माध्यमातून आत्महत्या नियंत्रणासाठी ट्रस्टकडून सेवाभावीवृत्तीने विविध उपक्रमांकरिता निधी देण्यात आला. जलयुक्‍त शिवार, कुक्‍कुटपालन, डेअरी तसेच कृषी मार्केटिंग क्षेत्रातही टाटा ट्रस्टने योगदान दिले आहे. 

सद्यःस्थितीत कोरोना विषाणूचा संसर्ग रोखण्याचे आव्हान प्रशासनासमोर आहे. संसर्ग रोखण्याकरिता सामाजिक अंतर राखणे, खोकताना किंवा शिंकताना तोंडावर रुमाल ठेवणे तसेच वारंवार हात धुणे असा उपायांची शिफारस करण्यात आली आहे. टाटा ट्रस्टकडून या मोहिमेत आपले योगदान म्हणून विदर्भातील काही जिल्ह्यांमध्ये सॅनिटायझरचे वितरण करण्यात आले.  अमरावती जिल्ह्यात २५०० लीटर हॅन्ड सॅनिटायझरचा पुरवठा करण्यात आला. यावेळी टाटा ट्रस्टचे क्षेत्र व्यवस्थापक राहूल दाभने, दिनेश चौधरी, चंदन गवारे, असीत मोहन उपस्थित होते. निवासी उपजिल्हाधिकारी वाव्हारे यांच्याकडे हॅन्ड सॅनिटायझर सोपविण्यात आले.