संत्रा फळगळीच्या सर्वेक्षणाचे आदेश

अमरावती : आंबीया बहारातील संत्र्याच्या फळगळतीमुळे संत्रा पट्ट्यात सुमारे ८५ कोटी रुपयांपेक्षा अधिकचे नुकसान झाले होते. या संदर्भात ॲग्रोवनमध्ये वृत्त प्रकाशित करण्यात आले होते. त्याची दखल घेत प्रशासनाकडून संयुक्‍त सर्वेक्षणाचे आदेश देण्यात आले आहेत.

प्रतिकूल हवामानाचा फटका बसत यावर्षी आंबीया बहारातील संत्र्याची फळगळ झाली होती. दोन महिने पावसाने दिलेला खंड, त्यामुळे तापमानात वाढ झाली. परिणामी संत्री बॉईल झाली. त्याचा फटका बसत फळगळ होऊ लागली. शेतकऱ्यांनी व्यापाऱ्यासोबत ३० लाख रुपयांत बागेचा सौदा केला असला तरी फळगळीमुळे उत्पादन कमी होणार असल्याने व्यापाऱ्यांनी केवळ तीन लाख रुपये शेतकऱ्यांना दिले. याविषयी सविस्तर वृत्त ॲग्रोवनने २८ ऑक्‍टोबर रोजी प्रकाशित केले होते. शेतकऱ्यांशी चर्चा केली असता फळगळीमुळे संत्रा पट्ट्यात ८५ कोटी रुपयांपेक्षा अधिकच्या नुकसानीचा अंदाज वर्तविण्यात आला होता. या वृत्ताची दखल घेत प्रशासनाकडून संत्रा बागेच्या सर्वेक्षणाचे आदेश देण्यात आले आहेत. महसूल आणि कृषी विभागाकडून हे संयुक्‍त सर्वेक्षण करण्यात येणार आहे.

आंबीया बहारातील संत्रा फळगळीविषयी शेतकऱ्यांच्या तक्रारी होत्या. त्या पार्श्‍वभूमीवर महसूल व कृषी विभागाकडून संयुक्‍त सर्वेक्षण केले जात असून काही ठिकाणचे अहवालदेखील प्राप्त झाले आहेत, असे अमरावतीचे जिल्हाधिकारी अभिजित बांगर यांनी सांगितले.