‘कृषी संजीवनी’तील कामांची जागतिक बॅंकेच्या पथकाकडून पाहणी

नांदेड : कामठा बुद्रुक (ता. अर्धापूर) येथील नानाजी देशमुख कृषी संजीवनी प्रकल्पातंर्गत कामांची जागतिक बँकेच्या पथकाने रविवारी (ता. २२) कामठा येथे भेट देऊन पाहणी केली. या प्रकल्पाच्या अंमलबजावणीसाठी येणाऱ्या अडचणी, समस्या जाणून घेण्यासाठी त्यांनी शेतकऱ्यांशी चर्चा केली. 

या प्रकल्पातंर्गत हवामान अनुकूल तंत्रज्ञान वापरून आयोजित केलेल्या शेतीशाळेची माहिती या वेळी त्यांना देण्यात आली. त्यात वापरलेल्या तंत्रज्ञानात हवामान अनुकूल वाणांचा वापर, समतल मशागत, रुंद सरी वरंबा पद्धतीवर सोयाबीन लागवड, आंतरपीक पद्धती आदीबाबत या पथकाने चर्चा केली. प्रकल्पातील वैयक्तिक बाब राबविण्यासाठी घटकांमधील अनुदानाच्या रकमेशिवाय उर्वरित रक्कम बँकेमार्फत कर्जाऊ सुविधा द्यावी. या गावांमध्ये लाभक्षेत्र असल्यामुळे जलसंधारणाची कामे राबविण्यात अडचणी येतात. त्यामुळे जुन्या विहिरींचे पुनरुज्जीवन करावे, आदी मागण्या शेतकऱ्यांनी केल्या.

प्रकल्प संचालक विकासचंद्र रस्तोगी, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक काकडे ,जिल्हा अधीक्षक कृषी अधिकारी रविशंकर चलवदे, उपविभागीय कृषी अधिकारी आर. टी. सुखदेव, तहसीलदार सुजित नरहरे उपस्थित होते. 

हवामान बदलास विविध घटक कारणीभूत आहे. शेतकऱ्यांनी पीक पद्धतीत बदल करणे आवश्यक आहे. पाण्याचा कार्यक्षम वापर करून ठिबक व तुषार सिंचन पद्धतीचा जास्तीत जास्त अवलंब करणे गरजेचे आहे, असे या वेळी सांगण्यात आले. कृषी सहाय्यक गजानन पंडागळे, कामठा बुद्रुक येथील ग्राम कृषी संजीवनी समितीचे सदस्य, शेतकरी उपस्थित होते. कामठा बुद्रुक येथील कृषी सहायक सुनील सूर्यवंशी यांनी प्रास्ताविक केले.