‘कडकनाथ’प्रकरणी कारवाई करण्याचे स्वाभिमानीचे साताऱ्यात निवेदन 

सातारा : कडकनाथ घोटाळ्याप्रकरणी पाटण पोलिस ठाण्यात दाखल असलेल्या गुन्ह्यातून कृषी राज्यमंत्री सदाभाऊ खोत यांच्या मुलासह तिघांना आरोपीऐवजी बेकायदेशीरपणे साक्षीदार बनविण्याचा प्रकार करणाऱ्या अधिकाऱ्यावर कारवाई न झाल्यास, तसेच या गुन्ह्याला एमपीआयडी कायद्याचे कलम तातडीने न लावल्यास पोलिस अधीक्षक कार्यालयावर माजी खासदार राजू शेट्टी यांच्या उपस्थितीत मोर्चा काढण्याचा इशारा स्वाभिमानी शेतकरी संघटनेने दिला आहे.

याबाबत जिल्हा पोलिस अधीक्षक तेजस्वी सातपुते यांना निवेदन देण्यात आले. निवेदनात म्हटले आहे, की कडकनाथ घोटाळ्याप्रकरणी पाटण पोलिस ठाण्यात ७२ शेतकऱ्यांची सुमारे एक कोटी ४८ लाख २३ हजार ५१९ रुपयांची फसवणूक केल्याप्रकरणी गुन्हा दाखल झाला आहे. या गुन्ह्यामध्ये सागर खोत याच्या नावाचा सहा क्रमांकाचा आरोपी म्हणून समावेश होता; पण त्याच्यासह अन्य दोन लोकांची नावे राजकीय दबावापोटी संगणकीय चूक दाखवून आरोपीतून काढून साक्षीदार करण्याचा प्रकार पोलिस ठाण्याच्या अधिकारी व कर्मचाऱ्यांनी केला आहे. हे प्रकरण राज्यभर गाजत आहे. 

सत्तेशी संबंधितांचा यात समावेश असल्याने हे प्रकरण दाबून टाकण्याचा प्रयत्न होणार, अशी सर्वसामान्याची भावना आहे. अशातच पाटण पोलिसांनी असे कृत्य केले आहे. त्यामुळे अन्याग्रस्त शेतकऱ्यांना न्याय देण्यासाठी या गुन्ह्यातून विना तपास कोणाचीही नावे वगळण्यात येऊ नयेत, नावे वगळणाऱ्या अधिकारी व कर्मचाऱ्यांवर कडक कारवाई करावी, तसेच या गुन्ह्याला एमपीआयडी कायद्याची कलमे लावण्यात यावी. या मागण्या तातडीने मान्य न झाल्यास राजू शेट्टी यांच्या नेतृत्वाखाली सोमवारी (ता. १६ सप्टेंबर) पोलिस अधीक्षक कार्यालयावर मोर्चा काढण्यात येईल, असा इशारा संघटनेचे जिल्हाध्यक्ष राजू शेळके व पदाधिकाऱ्यांनी दिला आहे.