`स्वाभिमानी`चे सोमवारी राज्यात चक्का जाम आंदोलन ः देवेंद्र भुयार

बुलडाणा  ः राज्यात या वर्षी पावसामुळे शेतकऱ्यांचे मोठे नुकसान झाले आहे. राज्याच्या कोणत्याच भागातील शेतकऱ्यांच्या घरात या वर्षी उत्पन्न आलेले नाही. अशावेळी शासन व प्रशासनाने शेतकऱ्यांना आधार देण्याची गरज असताना, राजकीय व्यवस्था सत्ता स्थापनेच्या गोंधळात, तर प्रशासन आदेशाच्या प्रतीक्षेत आहे. त्यामुळे शेतकऱ्यांना नुकसानभरपाई मिळावी, यासाठी स्वाभिमानी शेतकरी संघटनेच्या वतीने सोमवारी (ता. ११) राज्यभर चक्का जाम आंदोलन करण्यात येणार असल्याचे आमदार देवेंद्र भुयार यांनी सांगितले.

विदर्भातील ‘स्वाभिमानी’चे आमदार देवेंद्र भुयार यांनी मंगळवारी बुलडाण्यात पत्रकारांशी संवाद साधला. या वेळी रविकांत तुपकर, राणा चंदन उपस्थित होते. आमदार भुयार म्हणाले, की कॉर्पोरेट कंपन्यांचे कर्ज जसे मोठ्या मनाने माफ केले जाते, त्याच पद्धतीने आता सरकारने शेतकऱ्यांचे कर्ज माफ करून त्यांना भरघोस मदत देणे आवश्यक आहे. पीकविम्यासाठी कंपन्यांनी स्वतंत्रपणे सर्व्हे न करता महसूल आणि कृषी विभागाने केलेले पंचनामे अंतिम मानून नुकसानभरपाई देण्याची गरज आहे.

नुकसानभरपाईच्या अटींमध्ये सुधारणा करण्याची गरज आहे. काळजीवाहू मुख्यमंत्र्यांनी जाहीर केलेली दहा हजार कोटींची मदत तुटपुंजी आहे, त्यामुळे शासनाने शेतकऱ्यांच्या मदतीसाठी विशेष पॅकेज जाहीर करावे, अशी मागणीदेखील श्री. भुयार यांनी या वेळी केली. यावेळी  रविकांत तुपकर, आमदार भुयार यांनी सावळा, भादोला, वरवंड, डोंगर खंडाळा या भागात नुकसानीची पाहणी करून शेकऱ्यांनी संवाद साधला.