दूधदरवाढीसाठी ‘स्वाभिमानी’चे परभणीत उपोषण सुरू

परभणी ः मराठवाड्यात शासकीय दूध योजनेअंतर्गंत खरेदी केल्या जाणाऱ्या दूध दर तसेच वाहतूक खर्च, कमिशनमध्ये वाढ करण्यात यावी. खरीप पीकविमा परतावा देण्यात यावा, आदी मागण्यांसाठी स्वाभिमानी शेतकरी संघटनेतर्फे शुक्रवारी (ता. २४) बेमुदत उपोषण सुरू करण्यात आले.

गेल्या वर्षीच्या दुष्काळी स्थितीत शासनाने दूध दरात दोन रुपयांनी कपात केल्यामुळे दुधाचे दर प्रतिलिटर २७ रुपयांवरून २५ रुपये करण्यात आले. पश्चिम महाराष्ट्र आणि मराठवाड्यातील दूधदर समान करण्यात आले. परंतु, दोन महिन्यांनंतर पश्चिम महाराष्ट्रातील दुधाचे दर प्रतिलिटर ३२ रुपये करण्यात आले. परंतु, मराठवाड्यातील दूध उत्पादकांना अजूनही शासकीय दुग्ध शाळेत २५ रुपये लिटरने दूध घालावे लागत आहे. 

मराठवाडा आणि पश्चिम महाराष्ट्रातील दूधदरातील तफावत दूर करण्यासाठी परभणी जिल्ह्यातील दूध उत्पादकांना ३२ रुपये प्रतिलिटरप्रमाणे दर देण्यात यावा. त्याचप्रमाणे अतिवृष्टीमुळे खरीप पिकांचे नुकसान झालेल्या शेतकऱ्यांना पीकविमा भरपाईचे वाटप तत्काळ करण्यात यावे. या मागण्यांसाठी स्वाभिमानी शेतकरी संघटनेचे जिल्हाध्यक्ष किशोर ढगे यांच्या नेतृत्वाखाली डिगांबर पवार, भास्कर खटींग, रामप्रसाद गमे, दीपक गरुड, माऊली बोकारे आदींनी छत्रपती शिवाजी महाराज यांच्या पुतळ्याजवळ बेमुदत उपोषण सुरू केले आहे.