जालन्यात विम्यासाठी ‘स्वाभिमानी’चे आंदोलन

जालना : मोसंबीचा विमा संरक्षण कालावधी १५ सप्टेंबर रोजी संपलेला आहे. तब्बल दोन महिने उलटूनही शेतकऱ्यांच्या खात्यावर मंजूर विमा वर्ग करण्यासाठी विमा कंपनीकडून दिरंगाई होत असल्याने स्वाभिमानी शेतकरी संघटनेच्या वतीने एचडीएफसी एर्गो विमा कंपनीच्या जालना येथील कार्यालयात मंगळवारी (ता. ३०) मुक्काम ठोको आंदोलन सुरू करण्यात आले.

जालना जिल्ह्यातील मोसंबी उत्पादक शेतकऱ्यांचा आंबिया बहर २०२० चा मंजूर झालेला मोसंबी फळपीक विमा अद्यापपर्यंत मिळाला नाही. त्यामुळे स्वाभिमानी शेतकरी संघटनेच्या वतीने ३० नोव्हेंबर रोजी विमा कंपनी कार्यालयात मुक्काम ठोको आंदोलन करण्याचा इशारा देण्यात आला होता. या बाबत स्वाभिमानी शेतकरी संघटनेच्या वतीने एचडीएफसी एर्गो या विमा कंपनीच्या जिल्हा प्रतिनिधीस निवेदन देण्यात आले. 

स्वाभिमानी शेतकरी संघटनेचे जिल्हाध्यक्ष सुरेश काळे यांनी दिलेल्या निवेदनानुसार, हवामान आधारित फळपीक विमा योजनेत मोसंबी फळपिकाचा विमा मंजूर झालेला असतानाही अद्यापपर्यंत शेतकऱ्याच्या खात्यावर वर्ग करण्यात आलेला नाही. शासन निर्णयामध्ये असे नमूद करण्यात आले, की अधिसूचित पिकाचा संरक्षण कालावधी संपल्यानंतर तीन आठवड्यांत विमा रक्कम शेतकऱ्यांच्या खात्यात वर्ग होणे बंधनकारक आहे. 

मोसंबीचा विमा संरक्षण कालावधी १५ सप्टेंबर रोजी संपलेला आहे. तब्बल दोन महिने उलटूनही शेतकऱ्यांच्या खात्यावर मंजूर विमा वर्ग करण्यासाठी विमा कंपनी दिरंगाई करीत आहे. संघटनेच्या वतीने वारंवार या कंपनीकडे पाठपुरावा करण्यात आला. दरवेळी आठ दिवसांची मुदत या कंपनीकडून मागण्यात येत होती. विमा जमा करण्यासाठी ‘तारीख पे तारीख’ असे होत असल्याने शेतकऱ्यांच्या संयमाचा बांध फुटत आहे. जिल्ह्यातील सुमारे ३२ कोटी रुपये विमावाटप कंपनीच्या चालढकल पणामुळे रखडले आहेत. जोपर्यंत पैसे मिळत नाही, तोपर्यंत मुक्काम ठोको आंदोलन करण्यात येणार, असे ‘स्वाभिमानी’ने निवेदनात स्पष्ट केले होते.