अकोट येथे उडीद पिकाची प्रतिकात्मक होळी

अकोला ः पावसाने पिकांची दाणादाण उडविली आहे. शेतकऱ्यांना हेक्टरी ५० हजार रुपयांची मदत द्यावी व सरकारने ओला दुष्काळ जाहीर करावा, अशी मागणी करीत समाज क्रांती आघाडीने अकोट येथे उडीद पिकाची प्रतिकात्मक होळी केली. शासनाने मदत न केल्यास आंदोलन करण्याचा इशारा संघटनेचे जिल्हा कार्याध्यक्ष दिगंबर पिंप्राळे यांनी दिला.

प्रमाणापेक्षा जास्त पाऊस झाल्यामुळे शेतकऱ्यांचे अतोनात नुकसान झाले. शेतकऱ्यांच्या हातचे पीक उद्ध्वस्त झाले असून त्यांना आता पुढल्या पिकाची चिंता निर्माण झाली आहे. उडीद, सोयाबीन, कापूस, ज्वारी यासह विविध पिकांचे नुकसान झाले असून सरकारने तत्काळ ओला दुष्काळ जाहीर करावा व हेक्टरी ५० हजार रुपये नुकसान भरपाई दिली पाहिजे.

शेतकऱ्यांना पुढील पिकासाठी कर्ज लवकर मिळावे यासाठी सरकारने बँकांना निर्देश द्यावेत, अशी मागणीही करण्यात आली. उडीद पिकाची होळी करताना पिंप्राळे यांच्यासह अकोट तालुकाध्यक्ष रहीम कुरेशी, श्रीराम पिंप्राळे, शेख आसद, रामदास येले, शेख अशफाक, रामदास पिंप्राळे, माधव भारसाकळे, इरशाद सौदागर आदी शेतकरी उपस्थित होते.