‘ताकारी’चे पाहिले आवर्तन बंद ः डवरी

सांगली ः  ताकारी योजनेच्या लाभक्षेत्राची पाण्याची मागणी लक्षात घेऊन पाटबंधारेने ७ ऑक्टोबरला पाणी सुरू केले होते. या पाण्याने सुमारे १२३ कि.मी. पर्यंत सिंचनक्षेत्राला दिलासा मिळाला. योजनेचे पंप बंद करण्यात आले आहेत. शेतकऱ्यांच्या मागणीनुसार दुसरे आवर्तनही वेळेत सुरू होईल, असा विश्वास कार्यकारी अभियंता राजन डवरी यांनी दिला.

यावर्षी मॉन्सूनसह परतीच्या पावसाने पूर्णतः दडी मारली. त्यामुळे सर्वत्र पिकांची होरपळ होत होती. जमिनीतील पाणीपातळी प्रचंड खालावली होती. या पार्श्वभूमीवर ताकारी योजनेचे पाणी सुरू करून खरिपांसह बारमाही पिकांना जीवदान द्यावे, अशी मागणी वांगीसह ताकारी लाभक्षेत्रातील शेतकऱ्यांची होती. यास अनुसरून पाटबंधारेने ऑक्टोबर महिन्याच्या पहिल्या आठवड्यात पाणी सुरू केले होते.

यंदा घाटमाथ्यावर अगदीच कमी पाऊस झाला. त्यामुळे जमिनीत पाणीसाठा झालाच नाही. मात्र लाभक्षेत्रात वाढलेल्या सिंचनक्षेत्रासाठी जमिनीतून प्रचंड पाणीउपसा होत आहे. त्यामुळे सप्टेंबरपूर्वीच पाण्याचे दुर्भिक्ष जाणवू लागले. नियमित बारमाही पिकांसह खरिपासाठी जमिनीतून भरमसाट पाणीउपसा झाला. त्यामुळे ओढे व नाले आटले. पाण्याचा खडखडाट होऊन पिकांचे अपरिमित नुकसान होण्याची भीती शेतकऱ्यांतून व्यक्त होत होती. 

लाभक्षेत्राची व्यथा जाणून पाटबंधारेने ७ ऑक्टोबरला सुरू केलेले पाणी मुख्य कालव्याच्या १२३ कि.मी.वर वंजारवाडी (ता. तासगाव) पर्यंत पोहोचल्यानंतर एका महिन्यानंतर योजना बंद करण्यात आली. ताकारीच्या माध्यमातून सोडलेल्या पाण्याचा उपयोग किमान पुढील महिनाभर शेतीसाठी तसेच काही गावांच्या पिण्याच्या पाण्यासाठी होईल. शेतकऱ्यांनी गरजेनुसार पाणी वापरून सिंचनक्षेत्र वाढवावे. या पुढील पाणीही वेळेत सुरू होईल, अशी माहिती कार्यकारी अभियंता राजन डवरी यांनी दिली.