चारा छावण्यांचे नियंत्रण काटेकोरपणे करा : डॉ. दीपक म्हैसेकर

सोलापूर : जिल्ह्यातील चारा छावण्याचे नियंत्रण काटेकोरपणे करा, अशा सूचना विभागीय आयुक्त डॉ. दीपक म्हैसेकर यांनी गुरुवारी (ता. ९) येथे दिल्या.

दुष्काळी कामाच्या आढाव्यासाठी जिल्हाधिकारी कार्यालयातील  बहुद्देशीय सभागृहात ही बैठक झाली. जिल्हाधिकारी डॉ. राजेंद्र भोसले, जिल्हा परिषदेचे मुख्य कार्यकारी अधिकारी डॉ. राजेंद्र भारूड, महापालिका आयुक्त दीपक तावरे, अतिरिक्त जिल्हाधिकारी रामचंद्र शिंदे, उपायुक्त प्रताप जाधव, पुरवठा शाखेच्या उपायुक्त नीलिमा धायगुडे, अतिरिक्त मुख्य कार्यकारी अधिकारी अर्जुन गुंडे, निवासी उपजिल्हाधिकारी आदी उपस्थित होते. 

डॉ. म्हैसेकर म्हणाले, ‘‘चारा छावणीतील जनावरांचे लसीकरण करा. लहान जनावरांचे निर्जंतुकीकरण करा. पशुपालक समितीची स्थापना करा, टॅंकर भरून घेण्यासाठीचे स्रोत निश्‍चित करा, टॅंकरची देयके जीपीएसचे लॉगबुक तपासूनच द्यावी, त्याबाबतची आवश्‍यक कागदपत्रे तपासून घ्यावीत, टॅंकरची क्षमता प्रादेशिक परिवहन अधिकारी यांच्याकडून खात्री करून घ्यावी. टॅंकरला अजिबात गळती असू नये.’’‘‘नरेगावरील कामावर मजूर येण्यासाठी नियोजन करावे. बंधाऱ्यातील गाळ काढण्याची कामे घ्यावीत. टॅंकर भरण्यासाठीच्या स्रोतांच्या परिसरातील वीजपुरवठ्याचे नियमन करताना उपविभागीय अधिकारी आणि तहसीलदार यांच्याशी चर्चा केली जावी,’’ अशाही सूचना डॉ. म्हैसेकर यांनी केल्या.  

पाण्यासाठी २४ तासांत टॅंकर 

पाणीटंचाईच्या गावातून मागणी आल्यास चोवीस तासांत टॅंकर दिला जाईल, असे जिल्हाधिकारी डॉ. भोसले यांनी सांगितले. टॅंकर मागणी असलेल्या गावांना उपविभागीय अधिकारी आणि गटविकास अधिकारी यांनी संयुक्तपणे भेट द्यावी. मागणीत तथ्य असल्यास तत्काळ टॅंकर द्यावे, अशी सूचनाही त्यांनी केली.

छावणीतील जनावरांना टॅंगिंग करा 

छावणी चालक आणि महसूल प्रशासनाच्या कर्मचाऱ्यांना जनावरांच्या बारकोडिंग बाबत प्रशिक्षण द्यावे, अशा सूचना पुरवठा उपायुक्त नीलिमा धायगुडे यांनी दिल्या. त्या म्हणाल्या, ‘‘दुधाळ जनावरांना ई-नाम प्रणालीवर नोंदणी करून घ्यावे. त्याच्या नोंदी ठेवा. प्रत्येक छावणीत पशुपालक समितीची स्थापना करावी. या समितीची बैठक दर आठवड्याला घ्यावी.’’