बोरामणी विमानतळासाठी भूसंपादनाची कार्यवाही करा ः उपमुख्यमंत्री पवार

सोलापूर ः बोरामणी येथील विमानतळासाठी आवश्यक असलेल्या उर्वरित २८ हेक्टर जमिनीच्या भूसंपादनासाठी नुकतेच राज्य शासनाने ५० कोटी रुपये देण्याचे आश्‍वासन दिले आहे. त्यानंतर उपमुख्यमंत्री अजित पवार यांनी या जमिनीचे तातडीने भूसंपादन करा, असे निर्देश महाराष्ट्र विमानतळ विकास प्राधिकरणाला दिले आहेत. त्यामुळे लवकरच विमानतळाचा हा प्रश्‍न मार्गी लागण्याची शक्यता आहे. बोरामणी विमानतळासाठी सुमारे १०० कोटी रुपये खर्चून ५०० हेक्टर जमिनीचे या आधीचे भूसंपादन केले आहे. आणखी २८ हेक्टर जमिनीची आवश्यकता आहे. गेल्या आठवड्यात उपमुख्यमंत्री अजित पवार यांनी ५० कोटी  रुपये मंजूर केले होते. त्यानंतर आता प्राधिकरणाला त्यांनी भूसंपादनासाठी निर्देश दिले आहेत.  प्राधिकरणानेही पुढे जिल्हाधिकाऱ्यांना यासंबंधीचा पत्रव्यवहार केला आहे. या भागातील सहमती असणाऱ्या शेतकऱ्यांकडून थेट खरेदी होणार आहे. शासनाच्या नियमानुसार योग्य तो मोबदला देऊन ही जमीन विमानतळासाठी घेतली जाईल. शेतकऱ्यांशी तशी यापूर्वीच चर्चा झाली आहे. त्यामुळे काही अडचण नाही, असेही जिल्हा प्रशासनाकडून सांगण्यात आले.