विकासकामांचे सूक्ष्म नियोजन करा : पालकमंत्री गुलाबराव पाटील

परभणी : जिल्ह्यतील विविध विकास कामांचे सूक्ष्म नियोजन करावे. तरतूद करण्यात आलेला निधी वेळेत आणि तत्परतेने खर्च करावा, असे निर्देश सहकार राज्यमंत्री तथा जिल्ह्याचे पालकमंत्री गुलाबराव पाटील यांनी दिले.

परभणी जिल्हा नियोजन समितीची बैठक पाटील यांच्या अध्यक्षतेखाली शनिवारी (ता.२२) जिल्हाधिकारी कार्यालयातील नियोजन समिती सभागृहामध्ये झाली. यावेळी २०१९-२० या वर्षात जिल्ह्यात करावयाच्या विविध विकास कामांच्या १५४ कोटी रुपयांच्या आराखड्यास मंजूरी देण्यात आली.

जिल्हा परीषद अध्यक्षा उज्वला राठोड, खासदार संजय जाधव, आमदार सर्वश्री बाबाजानी दुर्राणी, विजय भांबळे, डॉ.राहुल पाटील, जिल्हाधिकारी पी.शिवशंकर, मुख्य कार्यकारी अधिकारी पृथ्वीराज बी.पी., पोलिस अधिक्षक कृष्णकांत उपाध्याय, महापालिका आयुक्त रमेश पवार, अप्पर जिल्हाधिकारी विश्वंभर गावंडे, निवासी उपजिल्हाधिकारी अंकुश पिनाटे, जिल्हा नियोजन अधिकारी ए. एल. झाडे उपस्थित होते.

पाटील म्हणाले, जिल्ह्यातील विकास कामांना गती देवून कामे वेळेत पूर्ण करावी. पंतप्रधान आवास योजना, रमाई आवास योजनेच्या लाभार्थ्यांना बांधकामासाठी नियमानुसार वाळू उपलब्ध करुन द्यावी. घरकुलाची कामे पूर्ण होण्यासाठी संबंधित यंत्रणेच्या अधिकाऱ्यांनी लक्ष द्यावे. कृषी, समाज कल्याण, आदिवासी विकास प्रकल्प, महावितरण, अग्रणी बँक, जलयुक्त शिवार योजनेसह जलसंधारणविषयक करण्यात आलेल्या कामांचा आढावा घ्यावा.‘‘

दुष्काळी स्थितीत जलसंधारणाच्या कामाची निकड असताना जलयुक्त शिवार अभियानातंर्गतचा निधी समर्पित केल्याबद्दल लोकप्रतिनिधींनी तीव्र नाराजी व्यक्त केल्याची माहिती सूत्रांकडून मिळाली.