लष्करी अळीवर वेळीच योग्य उपाय करा : अजय मिटकरी

 जालना : ‘‘लष्करी अळीचा जीवनक्रम ओळखण्याची गरज आहे. अळीच्या वेगवेगळ्या अवस्थांचा अभ्यास करावा. पीक फेरपालट व वनस्पतिजन्य कीटकनाशकांच्या वापरावर भर द्यावा. दहा टक्‍क्‍यांहून जास्त प्रादुर्भाव दिसून आल्यास स्पायनेटोरम किंवा थायामेथोक्‍झाम अधिक लॅम्डा सायलोथ्रीन (संयुक्त कीटकनाशक) यांपैकी कीटकनाशकाची सुरक्षित पोषाख परिधान करून फवारणी करावी, असा सल्ला कृषी विज्ञान केंद्राचे पीक संरक्षण तज्ज्ञ अजय मिटकरी यांनी दिला.

जिल्ह्यातील खरपूडी कृषी विज्ञान केंद्रातर्फे बदनापूर तालुक्‍यातील वरूडी येथे मक्‍यावरील लष्करी अळीच्या नियंत्रणासाठी करावयाच्या व्यवस्थापनाविषयी जनजागृती करण्यात आली.  निक्रा प्रकल्पांतर्गत लष्करी अळी व्यवस्थापाविषयी प्रशिक्षण कार्यक्रम घेण्यात आला. उपविभागीय कृषी अधिकारी एन. आर. कोकाटे, तालुका कृषी अधिकारी व्यंकट ठक्‍के, कृषी विज्ञान केंद्राचे पीक संरक्षण तज्ज्ञ अजय मिटकरी, पशुसंवर्धन तज्ज्ञ डॉ. हनुमंत आगे, निक्रा प्रकल्पाचे वरिष्ठ संशोधन सहायक एस. बी. माने, कृषी सहायक के. यू. बनकर, वरुडीचे सरपंच दिगंबर भिसे, उपसरपंच राधाकिसन शिंदे आदी उपस्थित होते. 

कोकाटे म्हणाले, ‘‘मक्‍यावर लष्करी अळी दिसून येताच कामगंध सापळे लावावेत. सुरवातीला ५ टक्‍के निंबोळी अर्काची फवारणी करावी. आर्थिक नुकसानीची पातळी ओलांडल्यास शिफारशीत रासायनिक कीटकनाशकांची फवारणी करावी.’’ 

डॉ. आगे म्हणाले, ‘‘भविष्यातील चाराटंचाईचे संकेत पाहता मका पिकाचा मुरघास तयार करावा. प्रती जनावर तीन टन मुरघास करावा. त्यासाठी किमान ८ ते १० गुंठे मका लागवड करावी.’’ 

दरम्यान, मका पिकात कामगंध सापळे लावण्याचे प्रात्यक्षिकही दाखविण्यात आले. एस. बी. माने यांनी सूत्रसंचालन केले.