चाळीसगाव तालुक्‍यात अद्यापही टॅंकर सुरूच

जळगाव  ः जिल्ह्यात यंदा पावसाने नाबाद ११५.५ टक्‍क्‍यांपर्यंत आजअखेर मजल गाठली आहे. असे असले तरी चाळीसगाव तालुक्‍यात चार गावांना तीन पाण्याचे टॅंकर सुरूच आहेत.  जिल्ह्याची पावसाची सरासरी ६६३.२ मिलिमीटर एवढी आहे. आजअखेरपर्यंत ७०१.२ मिलिमीटर अर्थात १०५.५ टक्के पाऊस झाला. जिल्ह्यात दोनशे टॅंकर यंदा उन्हाळ्यात सुरू होते. ऑगस्टमध्ये इतर तालुक्‍यांतील पाणीटंचाई मिटली. मात्र, सप्टेंबर अर्धेअधिक संपला तरी चाळीसगाव तालुक्‍यातील चार गावांची पाणीटंचाई कायमच आहे.  टंचाईग्रस्त गावांत शिंदी, बोडर, करजगाव, चत्रभुज तांडा या गावांचा समावेश आहे. यंदा गिरणा धरणही शंभर टक्के भरले. त्यातून पाणी सोडण्यात आले. या धरणाचा गिरणा पट्ट्यातील गावांना पाण्याचा फायदा होतो. मात्र, चाळीसगाव तालुक्‍यात या पाण्याचा उपयोग का झालेला नाही? तेथे टॅंकर सुरू असल्याने आश्‍चर्य व्यक्त होत आहे.