मालेगावात संचारबंदीत यंत्रमाग सुरू; पाच मालकांवर गुन्हा

नाशिक : जिल्ह्यात संचारबंदी लागू असतानाही मालेगाव येथील काही यंत्रमाग उद्योग सुरू असल्याने संबंधित यंत्रमाग मालकांवर कारवाई करणाऱ्या पोलिस अधिकाऱ्याची तडकाफडकी बदली करण्यात आल्याचे वृत्त सगळीकडे पसरविण्यात आले आहे. या वृत्ताची शहानिशा करण्यात आली आहे. याबाबत पाच यंत्रमाग मालकांवर गुन्हा दाखल करण्यात आला असल्याचे, जिल्हाधिकारी सूरज मांढरे यांनी कळविले आहे.

संबंधित पोलिस अधिकाऱ्याने आपले कार्यक्षेत्र नसतानाही त्या यंत्रमाग उद्योगात जाऊन तेथील मजुरांना मारहाण केल्याचे आढळून आल्याने त्यांच्यावर कारवाई करण्यात आली आहे.सद्यःस्थितीत मालेगाव येथील एकही यंत्रमाग उद्योग सुरू नसल्याचे जिल्हाधिकारी मांढरे यांनी कळविले आहे.

काही दिवसांपूर्वी मालेगाव शहरातील काही यंत्रमाग सुरू आहेत, अशा पद्धतीची तक्रार प्राप्त झाली होती. लोकांनी असेही सांगितले की, यंत्रमाग बंद करण्याकरिता काही पोलिस तेथे आले होते. मात्र, त्या यंत्रमाग उद्योगावर कारवाई होण्याऐवजी संबंधित पोलिसांचीच बदली करण्यात आली, अशीही माहिती पसरविण्यात आली आहे. 

या प्रकरणी संबंधित पोलिस अधिकाऱ्यांकडून माहिती घेण्यात आली आहे. ते पोलिस अधिकारी आपले कार्यक्षेत्र सोडून दुसऱ्या कार्यक्षेत्रात कारवाई करण्यासाठी गेले होते. त्या ठिकाणी त्यांना दोन मजूर आढळले. त्यांनी त्या मजुरांना मारहाण केल्याचेही समोर आले आहे. त्यामुळे मालेगाव पोलिस उपअधीक्षकांनी संबंधित पोलिस अधिकाऱ्यांवर कारवाई केली आहे. आपली क्षेत्र सोडून कामगारांना, मजुरांना मारहाण करण्याबाबत त्यांच्याकडून खुलासा मागविण्यात आल्याचे जिल्हाधिकारी मांढरे यांनी कळविले आहे. तसेच सध्या मालेगाव येथील कोणतेही यंत्रमाग सुरू नसून, पाच मालकांवर गुन्हा देखील दाखल करण्यात आला आहे.

‘संचारबंदीचे उल्लंघन करू नये’ मालेगाव मध्ये पोलिस विभागाचे संचारबंदीत नियंत्रण असून, कायद्याचे उल्लंघन करणाऱ्यांवर निश्चितच कारवाई केली जाईल असे, श्री. मांढरे यांनी कळविले आहे. नागरिकांनीही आपल्या एखाद्या चुकीमुळे ‘कोरोना’चे रुग्ण वाढतील असे कोणतेही वर्तन करू नये, अन्यथा संबंधितांवर कठोर कारवाई करण्यात येईल, असा इशारा जिल्हाधिकारी मांढरे यांनी दिला आहे.